Footer

Global a problema ti nangina a taraon: PMS Asec

ANGELES, Pampanga -Indagadag ni Presidential Management Staff Assistant Secretary Butch Junia ti pannakikaykaysa dagiti kameng ti Kapisanan ng mga Brodkaster sa Pilipinas (KBP) nangruna iti panagin-inut tapno masolbar ti problema ti agtultuloy a panagpangato ti presio dagiti magatgatang.

“Global a problema ti nangina a taraon ken presio ti lana ket saan laeng a ti Filipinas ti pagilian ti agsagsagaba iti inflation,” kinuna ni Junia idinto nga impaganetgetna nga ar-aramiden ti gobierno ti kabaelanna tapno masigurado ti seguridad ti taraon, pannakaipromot ti seguridad ti enerhia, pannakapatalingenngen iti presio dagiti kangrunaan a magatgatang, pangipaay iti subsidies kadagiti marigrigat ken pannakaipakat iti austerity measures.

Ni Junia ti naisangayan a sangaili iti seminar ti KBP a naangay iti Oxford Hotel, Clark, Angeles, Pampanga itay Hunio 19-22.

Nakipartisipar iti daytoy a seminar ti 73  nga announcers, reporters, DJ, ken sumagmamano nga station managers iti radio nga AM ken FM, agraman dagiti adda iti telebision manipud iti nadumaduma a probinsia ti Luzon a pakairamanan ti Ilocos Sur, Cagayan, Pangasinan, Pampanga, Occidental Mindoro, Albay, ken dadduma pay.

Indauluan ni  Arlon Serdenia, KBP President, Ilocos Sur Chapter, ken agdama nga station manager ti DZTP Radio Tirad Pass, dagiti broadcasters iti Ilocos Sur a pakaibilangan da Jun Ramos ti DWRS, Jessie Ancheta ti Bombo Radio, DJ Joey iti FM, Jeff Barredo ken Danny Antalan iti DZTP Tirad Pass.

Nagpaay a resource da Mr. Rey Hulog, executive director ti KBP, Atty. Rudolfh Steve Jularbal, legal counsel ti KBP, Angelo Palmones, station manager ti DZMM/ABS-CBN Bctg., Ms. Mel Estonilo, professor, Broadcast Department ti UP-Diliman, ken Professor Luis Teodoro,  Journalism Department ti UP-Diliman.

Pakairamanan kadagiti tinaming dagiti brodkaster ti news gathering and research techniques for radio, the art of interviewing, writing and reporting radio news, logical fallacies and biases in writing commentary, ken dadduma pay.#

Comments are closed.