Footer

Ngimmato kaso ti dengue iti Baguio City

BAGUIO CITY – Ngimmato iti 26 porsiento ti kaso ti dengue ditoy siudad manipud iti Enero agingga iti Hunio 13, segun iti report manipud iti City Health Services Office.

Iti reportna ken ni City Health Officer Florence Reyes, kinuna ni Dr. Donnabel Tuvera nga iti 129 a barangay iti siudad, addan 48 a kaso ti dengue a nairekord ket maibilang a hotspots ti 13 a barangay agsipud iti panagsublisubli daytoy a sakit kadagitoy a lugar iti las-ud ti lima a tawen.

Kinuna ni Tuvera a ngimmato ti bilang ti kaso ti dengue iti siudad iti 26 porsiento no maidilig idi napan a tawen.

Karaman dagiti masipsiputan a hotspots dagiti barangay nga ABCR (Andres Bonifacio-Caguioa Street, Rimando Road), Aurora Hill, Brookside, Camp 7, Engineer's Hill, Fairview, Irisan, Pacdal, Loakan, Quezon Hill, Sta. Escholastica, Asin and Lourdes.

Kanaig daytoy, nangipila ni City Councilor Erdolfo Balajadia, pangulo ti committee on environment, iti proposed ordinance a mangilatang iti P1 milion para iti pannakagatang kadagiti ramit para iti pannakalapped ken pannakapugipog iti dengue ditoy siudad kas dagiti radio plugs, misting machine, insecticides, larvicides, sasakayan ken megaphone ken dadduma pay a sabsabali a magastos ken panagsurbey.

Kinuna ni Balajadia a di maaklon ti siudad nga adda manen matay maigapu iti maysa a sakit a malapdan ken maagasan a kas iti dengue gapu iti kakurang iti equipment ken panangsiput.

Kangrunaan a makagapu iti panagraira ti dengue ti panagbabasa agsipud iti panagbaliwbaliw ti tiempo gapuen iti panagbara ti lubong.

Kabayatanna, kinuna ti CHSO a maisayangsayangkat a nainget dagiti programa iti pannakapugipog ti dengue, kas iti estrikto nga implementasion ti sanitasion ken water container management, disease surveillance  mapping, ti naing-inget a kampania ti panagdaldalus iti sapasap a siudad babaen ti pannakitinnulong ti komunidad ken ti implementasion ti Four S (search for breeding site of mosquitoes, seeking early medical consultation, use self-protective measures and say no to indiscriminate fogging .#

Comments are closed.