Footer

Plete ti traysikel ngumato iti Vigan City

VIGAN CITY – Inaprobaran ti Sangguniang Panlungsod ditoy ti ordinansa a pannakaingato ti plete ti traysikel nga agpaspasada iti daytoy a siudad.

Sagudayen ti ordinansa a maipangato iti P2 ti singir ti plete ti traysikel manipud iti P8.00 iti P10.00.

Maikkan dagiti estudiante ken senior citizens iti diskuento ket agpleteda laeng iti P8.00.

Manipud met iti 8 p.m. agingga iti 5 a.m. agbalinton a P20 ti plete no maymaysa ti pasahero ken dumsaag iti uneg ti poblasion idinto a P16.00 iti estudiante ken senior citizen.

No nasursurok ngem dua ti pasahero nga agdissaag iti uneg ti poblasion, agpleteda iti P16.00.

Iti ruar ti poblasion, P20 kada pasahero ken P16 iti estudiante ken senior citizen no dua wenno nasursurok ti pasahero.

Mamulta ti agpaspasada iti traysikel iti P500 no aglabsing iti daytoy a paglintegan.

Nagpetision dagiti traysikelan a maingato ti plete ti traysikel gapu iti nagsasaruno nga isusuyop ti presio ti gasolina ken spare parts.#

Comments are closed.