Footer

Sarita: NGEM AYAT TI KANGRUNAAN ITI AMIN

AYAT. NAMNAMA. PAMMATI. NGEM  AYAT TI KANGRUNAAN ITI AMIN.

Nangrupanget ni Marco a nangbasa kadagitoy a balikas a naikuadro iti ngatuen ti lamisaan ni Mr. David Bacurnay, ti supervisor ti meter reading section ti Baguio Water District. Adda ni Marco iti opisina ni Mr. Bacurnay ta kiniddawna ti pannakaiyalisna iti area a pagbasbasaanna kadagiti metro.

“Anusamon a. Dayta pay nga area ti kabassitan!”

“Wen a, sir, ngem naminduakon a nakagat iti aso!”

“No agpakagatka a, loko,  talaga a makagatka a! Itulokmo met dayta bagim!” nagpaggaak pay ti bisor sana inaprosan ti pultakna. Ngem ti nagyegyeg a butit ti lakay a binigkes ti asul-langit a tisiert a namarkaan iti BWD ti nakaiturongan dagiti paningkiten a mata ni Marco. Agtawenen ti bisor iti innem a pulo ket dua. Tallopulo  ket pito metten ni Marco.

“Diak met pagayatan ti makagat, sir…”

“Apay ngarud a naminduakan a nakagat? Ti kunam, no maiyaliska iti area, maliklikamon dagiti aso?” nagpaggaak manen ti bisor. Naurnosnan dagiti papeles iti steel cabinet. Nagtugaw iti executive chair sa nagliad. “Idi inawatmo ti trabahom kas meter reader, inawatmo metten dagiti lapped iti panagbasam kadagiti metro agraman ti pannakaipasungalngalmo kadagiti aso!” 

Saan a nakatimek ni Marco. Ritrittuokenna dagiti ramayna a pinatibker ti panagtrabahona a kas pipe fitter iti maintenance section iti tallo a tawen.  Naiyakar iti meter reading lima a bulanen ti napalabas.

“Ket no sika pay ti nagpili iti area, loko! Sa ita, agbabawikan?” immulagat ti bisor kenkuana.

Agsipud ta as-asideg iti lugarda ken basbassit ti area a masakupan, daytoy ti pinili ni Marco. Ngem natakuatanna itan no apay liniklikan dagiti padana a meter reader daytoy nga area. Nauuyong ngamin dagiti aso ditoy a lugar.

“Siguro, simrekka lattan iti inaladan a dika man la nagpakada! Nasken met ti courtesy iti sangbayam sakbay nga agbasakbasakka iti inaladanna! Agunika. Ipakaammom ti kinaasinom. Nasayaat laeng ta awan ti mangidarum kenka iti trespassing,” imlek ti bisor ket napukaw dagiti singkitna.

“Isu met ti ar-aramidek, sir. Ngem talaga a nauuyong dagiti aso sadiay!”

“Anusam a, ta trabahom dayta!”

“NALAGIPNAK met laeng ni kabagis,” naggayad ti isem ni Marco kadayta a sumipnget a kassangpetna manipud iti trabaho. Nadatnganna ti pasarabo ti adingenna a naggapu iti Saudi. Pantalon kenkuana ken dadduma pay a para kadagiti tallo nga annakda ken Betty nga asawana.

“Bagaymo, lakay,” inyisem ni Betty idi naisuotna ti sumileng a nangisit a pantalon.

“Isuotko no bigat, ta, ne, nabayagen a di dataon nangisibbo,” kinuna ni Marco.

Gladiola Alley. Walo laengen a balay ti dina nabasa a metro. Iti ungto ti daya, eksakto nga agpikor iti Daisy Alley, induronna ti nakanganga nga asul a ruangan a landok. Nagmulagat idi nagngernger ti nangisit nga aso nga agtitillayon dagiti dadakkel a pukalna.  Sumarsaruno kenkuana dagiti lima nga uken a tumanaul.

Napanganga ken napamulagat ni Marco idi makitana a nagtitirad dagiti saong ti naganak ken kasla pay balla nga agkatkatay. Timmaray. Nakamatan ti aso. Nasakmal ti gurong ni Marco. Inggusugos pay ti aso ti sikbabna. Nagikkis ni Marco. Nagpaarayat.

“Blackie, nooo!” riaw ti nakuttong ken panayagen a babai iti ruangan. Nakabado iti nalabaga a Venus cut ken kupas a maong. Nakaisniker. Nakaiggem daytoy iti kasla kikit a kayo. Dinarupna a binalatbatan ti aso. Nagtaray ti aso a nagsubli iti uneg ti inaladan.          

“Nasaktankayo, mister?” kuna ti babai.

“Ayna, naguyong met dayta asoyon! Kumagat gayam! Ibaudyo koma!” pinampagna ti barukongna. Nakaron ti nerbiosna. Minirana  nga  immuna ti Extech Zion Meter Reader amangan ketdi no nadadaelen.  Naibbatanna itay dinarup ti aso.

“Nakabaud dayta ngem agpaspasuso ngamin isu nga imbulosmi. Kaasi met dagiti ukenna.”

Napamulagat ni Marco idi mariknana ti saniit ken apges. Nasipatna pay ti mugingna idi makitana a sangadakulapan ti naglaplapan ti aso iti kabarbaro a pantalon a sarabona iti kabsatna.

“Ti pantalonko!” makasangiten ni Marco.

“Adda sugatyo…”

Iti naglaplapan iti pantalon, nakita ni Marco dagiti lemma dagiti ngipen iti kanawan a gurongna. Naglagaw. Piniselna dagiti lemma tapno agdara. Nariknana ti ut-ot.

“Saanka nga agdanag, mister. Naindieksionan iti anti-rabies ti asomi. Sumrekkayon ta mangalaak iti bawang nga iradradmo,” kinuna ti babai.

“Ania ket ti trabaho a kastoyen aya, kapamitlokon ti makagat!” naisakuntip ni Marco.

         (Adda tuloyna)

Comments are closed.