Footer

BANNER NEWS: P20-M pondo para rehabilitasion ti Mindoro airport road, inkalintegan ti DPWH

VIGAN CITY – Nailatang ti P20 milion a pundo para iti rehabilitasion ken rekonstruksion ti Mindoro airport road ket saan a mabalin nga ipan iti sabali a proyekto.

Daytoy ti panangikalintegan ni Department of Public Works and Highways District Engineer ti 1st Engineering District Andrelito Tagorda iti sanguanan dagiti konsehal iti panagsessionda itay Hunio 30.

“Saanmi a mabalin nga ipan iti sabali a lugar gapu ta maiparit dayta. No ania ti pakaipanan ti pondo, dita ti pangipananmi,” inlawlawag ni Tagorda.

Kinuna ni Tagorda a kiniddaw ni dati a Mayor Ferdie Medina idi nakatugaw pay laeng daytoy ti nasao a pundo ngem itay laeng nabiit a simmangpet idinto nga inyunay-unayna a no ania ti programa a nakailatanganna ti pakaiyimplementaranna.

Innayon ti district engineer a  saan a kaskarina ti mai-realign ti pondo ta tawen ti urayen manen tapno maiyimplementar kalpasan ti rekomendasion nga aggapu iti diputado.

Kinuna ni Tagorda a no kas pangarigan maaprobaran ti pannaka-realign ti pundo,  nalabit agpasonto met laengen daytoy.

Simmango ni Tagorda iti sanguanan dagiti konsehal tapno ilawlawagna ti isyo a naipalaon iti privilege speech ni Konsehal Benjo Verzosa idi Hunio 23 a nangdillawanna no apay a mapappapintas ti dalan nga agturong iti Mindoro airport idinto a nasayaat pay laeng idinto nga adda met dagiti sabsabali a kalsada iti siudad ti Vigan a maikkan koma iti prioridad a masimpa.

Mainaig iti pannakaaspalto ti dalan nga agturong iti University of Northern Philippines iti Tamag ken paset ti Ayusan, inkalintegan ni Tagorda a kasta ti teknolohia iti agdama,  maaspalto diay makitada a  medio napintas ta saan met a mabalin a maparabawan iti aspalto no dadakkel ti rekkanan.

“Kasta a talaga ti teknolohia. Saan a mabalin a parabawan iti aspalto ti rengnga-rengngat a kalsada agsipud ta no matuduan, nadadaelen,” kinuna ni Tagorda.

Iti saludsod ni ni Konsehal Audie Agdamag no masursurot met ti ordinansa ti siudad a no adda proyekto a maaramid  iti sakup ti Vigan, masapul a 60% kadagiti trabahador  ti residente ditoy siudad, insungbat  ni Tagorda nga aware iti dayta a paglintegan ti city government ngem iberipikananto  iti kontraktor no sinurotna dayta wenno saan.

Kiniddaw ni Konsehal Everin Molina ken ni Bise Mayor Franz Ranches ti napimpintas pay a koordinasion iti panagplano ken panagilakad iti papeles ti DPWH ken ti Vigan City engineering office tapno nasaysayaat ti implementasion ti proyekto.

Karaman a dimmatag iti session kabayatan ti question hour da Engr. Reynaldo Ablog ken Engr. Urbano Palacpac agpada nga empleado iti nasao nga ahensia ti gobierno.#

Comments are closed.