Footer

EDITORIAL: National Disaster Consciousness Week, maysa a didigra?

Sinelebraran ti sangkapagilian ti National Disaster Consciousness Week iti umuna a lawas ti Hulio. Wenno ad-adda a mayannatup a National Disaster Week ti sinelebrarantayo?

Didigra, makunatayo ta iti itatapog ti umuna a lawas ti Hulio, madama pay laeng ti panagiyaon kadagiti biktima ti napattog nga MV Princess of the Stars. Ginasuten ti natay iti daytoy limned a barko ti Sulpicio Lines. Pinullo metten ti natay iti layus a nakadadaelan ti minilmillion a sanikua gapu iti iduduprak ni Bagyo Frank.

Malapdan ti disgrasia, wen. Kasta met a malapdan ti didigra. Daytoy ti kayat nga ipasagepsep ti National Disaster Consciousness Week. Ngem ti pannakalned dagiti ferry boat ken barko,  nasaknap a layus ket didigra a parnuayen ti tao.

Ti tao ti agar-aramid iti bukodna a didigra. Kas iti layus. No koma saan a kinalbo ti tao dagiti bantay, no koma  adu pay laeng dagiti kayo, no awan koma dagita a minasan nga agdaddadael kadagiti  bantay ken agiwara iti luyak kadagiti karayan, awan koma ti nasaknap a layus. Ngem gapu iti kinaawan ti sinseridad dagiti agtuturay iti pannakaisardeng iti pannakakalbo dagiti bantay, gapu iti panagpukan kadagiti kayo, ken ti panagminas kadagiti banbantay, agtultuloy latta ti panagsagraptayo iti didigra ti layus. 

Temporario laeng a solusion iti kinakurapay ken panggedan ti panagminas. Kasapulan ti solusion a napapaut a sagrapen ken saan nga agibunga ti didigra. Di umno a solusion kadagiti parikut iti maysa a banag nga agibunga met laeng iti nasaknap a parikut.

Tao met laeng ti nagaramid iti didigrana. Iti MV Princess, segun kadagiti nakalasat, impapilit kano latta ti kapitan ti inda panaglayag uray no adda bagyo. Ngamin, nagdepende ti kapitan iti kinadakkel ti barko, ta isu daytoy ti kadakkelan a barko a pampasahero iti pagilian. Ngem nagbiddut iti panangipagarupna. 

Wen, adu ti matmatay iti biddut a panangipagarup. Ngem awan ti umuna a babawi no di maudi a kankanayon.

Adda met laeng iti tao ti panagannad. Maksayan,  maliklikan wenno malapdan amin a didigra ngem depende no kayattayo a liklikan ken lapdan.

Agingga iti adda minasan, panagkalbo kadagiti bantay, panagpukan kadagiti kayo, agsagraptayo kadagiti didigra nga ibunga ti layus. Agingga nga adda agdepende iti “pagarup”, agtultuloy latta ti didigra iti baybay ken iti sadinoman iti aniaman nga oras ken kanito. Agingga nga adda  panangiyaleng-aleng ti salun-at, addanto latta tumpuar a peste ken sakit a pasaren ti tao.

Agingga nga agsagraptayo iti nakaro a didigra, iti uray ania a klase, kita ken rason, makunatayo a saan a nagballigi no di ket napaay ti programa ti Departamento ti Salun-at a National Disaster Consciousness Week. (JMA)

Comments are closed.