Footer

SALAYSAY: Agannad: baka sika ti sumaruno a biktimaen dagiti manangallilaw (Maika-10 a paset)

Iti umuna pay laeng a surat, posible a dawatenen dagiti scammers iti biktima dagiti sumagmamano a detalye ti biagna, kas iti nagan, pagtaengan, pagsapulan, bank account, ATM account, credit card ken dadduma pay a kasla inosente a banag tapno nadardaras (kuno) ti pannakaited ti gunggona iti biktima. No saan a masiputan daytoy ti biktima,  mabalin a maaramat dagiti intedna nga impormasion iti pannakabekkelna.

Pagarigan, no naited ti biktima ti numero ti ATM account wenno credit cardna iti scammer, kabaelan daytoy ken dagiti kakaduana nga iruar dagiti naggian a kuarta ket inton agbalaw ti biktima, naungkosanen ti kuartana wenno naiyutang payen agingga iti karabukobna.

Sumaruno nga addang ti scammer ti panangidagadagna iti biktima ti panangkontakna iti claims agent tapno maalana ti premiona. Iti laksid ti pannakaammo ti biktima, kakumplot ti scammer ti claims agent.

No kimmontak ti biktima iti claims agent, todas ni laing! Ibaga daytoy a kasapulan a kumaut ti biktima iti bulsana agsipud ta adda sumagmamano a mabayadan, kas iti bayadan iti courier, iti bangko ken no ania ditan a bayadan wenno buis. Pangsepsep laeng ti claims agent dagitoy a pagbayadan ngem no rumimbaw iti panunot ti biktima ti kadakkel ti agur-uray kenkuana a gunggona, iyawatna lattan a kasla mama ti dawatenda kenkuana.

Ngem no pudno a lottery ti naangay, awan ti bayadam tapno makolektam ti inabakmo. No adda buisna, bayadam KALPASAN ti pannakaawatmo iti inabakmo. Awanen ti sabali pay a bayadam. Saan a dumawat ti opisina ti lehitimo a lottery iti aniaman nga advance payment iti premiom.

Kasta met a no nangabakka, sika ti mangkontak iti opisina a nangisayangkat iti lottery ken masapul nga iggemmo ti nangabak a tiket. Ania ngarud ti isakadam no awan ti tiketmo? Ken saandaka a pakaammuan ti lottery no nangabakka babaen ti E-mail, telepono wenno koreo.

Dadduma a panangallilaw iti email

Iti internet ti kapardasan ita a pangallilawan kadagiti tattao. Nupay agduduma ti wagas ti panangallilaw babaen dagiti email, maymaysa ti puntiriada, ti panangbiktimada iti napilida a lokuen.

Adtoy nga ibinsabinsami ditoy dagiti dadduma pay a klase ti lottery scam tapno makapagannad dagiti tattao.

Kas iti email wenno website a mangibagbaga iti potensial a biktima nga adda inabakna iti lottery ngem adda pay extra a premio a maalana no sungbatanna a dagus ti email wenno web page.

Kadawyan nga itanggaya dagiti scammers ti libre a panagbakasion iti maysa a nalatak a beach resort wenno lugar no komontak ti biktima iti contact agent.

No kimmontak ti biktima, ibaga ti contact agent a mapan  daytoy iti maysa nga opisina wenno pagtagilakuan tapno maammuanna no kasano a maalana ti kanayon a premiona. No napan ti biktima iti nasao a lugar, maduktalanna a sakbay a maalana ti premiona, masapul a gumatang iti nangina a tagilako iti nasao a pagtagilakuan. Gapu ta napasubon, kapilitan a gatangen ti biktima ti  produkto.

Agpayso, maited ti premio ngem naggasto metten ti biktima iti dakdakkel pay ngem ti maited kenkuana a premio.

Ketdi, maibilang a legal daytoy nupay maysa a klase ti panangallilaw kadagiti tattao.

Agraira pay ti panaglakuan iti produkto wenno serbisio babaen ti email.

Kas pagarigan ti email a mangitanggaya kenka iti maysa a produkto a di pay mailaklako iti merkado ngem maited kenka iti normal a presiona.

Siempre, maawiska agsipud ta dakkel ti maleksabmo no magatangmo daytoy nga umuna samo ilako iti nanginngina a presio. Ditoy a sumrek ti kinabuklis wenno kinagamrud a puon ti pakaikaglisan ti maysa a tao wenno pakairaremanna.

Sigurado, kalpasan a naipatulodmo ti kuarta, saan a maideliber ti produkto ket agur-urayka laengen iti angin.

Ti makadakes no naitedmo pay iti scammer ti sumagmamano nga impormasion mainaig iti  credit cardmo, maduktalamto laengen a dimo napupuotan a gimmatangka kadagiti produkto ken tagilako nga inaramatmo a pinagbayadmo ti credit cardmo.

No makaawatkayo iti email manipud iti maysa a negosio wenno bangko nga adda naideposito a kuartam, saanka nga agdarasudos a mangsungbat.

Kas daytoy a panangallilaw. Agsurat kenka ti scammer nga adda nasukalanna a panangbalballaibo iti bangkom wenno kompania a pagtrabahuam ket kasapulan nga ipatulodmo ti sumagmamano a detalye tapno makumpirma ti impormasion nga adda kadakuada ket iti kasta maikkanka iti password tapno masalakniban ti kuartam.

No kimmagatka ket impatulodmo dagiti impormasion a dinamagda, kaasika pay ta mabalin nga aramatenda dagitoy a pangiruar iti kuartam wenno aniaman a kayatda nga aramiden.

Iti immun-una a paset daytoy a salaysay, nadakamattayo ti kaadda dagiti maaw-awat a surat iti email nga agpatpatulong para iti pannakaisalbar ti biag ti maysa a nabaknang a balud wenno napupok iti maysa a pagilian a panggepna ti aglibas. Siempre, kas panglawin iti biktima, adda agur-uray kenkuana a dakkel a gunggona, mabalin a kuarta, balitok, wenno antigo nga alikamen, kas sukat ti maitedna a tulong (kaaduanna a kuarta met laeng).

Maysa a klase nga scam daytoy a kaarngi ti maaw-awagan iti Spanish prisoner scam wenno Turkish prisoner scam.

Nabayagen a kimmita daytoy a klase ti panangallilaw. Ngem adda latta dagiti agsangpet nga email nga umarngi iti orihinal a panangallilaw.

Agannad pay kadagiti email a makigayyem iti internet. Adda met panangallilaw ditoy ta babaen ti natagapulotan a panagsurat ti scammer, matnag ti rikna ti biktima kenkuana. Inton addan relasionda babaen ti internet, ibaga ti scammer a nahold-ap, natakawan wenno adda pangta iti biagna ket kasapulanna ti kuarta tapno umadayo iti pagilianna ket mapan iti lugar ti biktima.

Adda latta met dagiti matinnag iti daytoy a klase ti panangallilaw.

       (Adda tuloyna)

Comments are closed.