Footer

Ubing a Chess Player, Triple Medalist iti Vietnam

VIGAN CITY – Sikat ita ti pito ti tawenna ken Grade II nga ubing a taga-San Julian itoy a siudad kalpasan nga inyawidna ti tallo a pirak a medalia iti 9th Asean Age Group Chess Federation a naangay idi Hunio 9-18 sadiay Danang, Vietnam.

Inyalat ni Daniel John Alibin Lemi ti maikadua (silver) a puesto iti standard, rapid ken blitz category iti nasao a torneo ti chess a nakisalipan ti siam a miembro ti Association of South East Asian Nations.

Segun kada Robert Lemi (i-Tagudin) ken Eldy Alibin Lemi (i-Vigan City), nagannak ni Daniel John, nangrugi nga agessem iti ahedres ti anakda idi agtawen daytoy iti lima kalpasan a naregaluan iti chess board.

Kinunana a nadaras a nakasursuro ti anakna ket dagus a nagbalin a kiddie champion iti umuna a pannakisalipna iti probinsia ti Abra. Nagsasaruno pay ti panangabakna kadagiti torneo ti chess a simmalipanna a pakairamanan ti Rimat ti Amianan Chess tournament iti San Fernando, La Union kasta metten dagiti agduduma a torneo iti siudad ti Vigan. Idi Abril daytoy a tawen, nagbalin a National Champion iti National Age Group a simmalianna a nakapilianna kas maysa kadagiti tallo a representante ti pagilian a nakisalip iti chess iti Vietnam.

Nagsaruno a pinadayawan ti siudad ti Vigan ken ti gobierno probinsial ni Daniel John gapu iti panangabakna iti chess iti Vietnam. 

Inkari ni Gob. Deogracias Victor “DV’ Savellano ti panangtedna iti pammadayaw  ken cash incentive kas panangbigbigna iti gapuanan ti ubing.

Inannugot met ti inana a pasaray agkurang pay ti premio a maaw-awat ti anakna iti magastosda a mapan makitorneo, aglalo iti ruar ti pagilian.

“Iti ASEAN, medalia laeng ti inawat ni Daniel John, awan ti cash prizena,” kinuna ni Eldy kagiddan ti panagyamanda iti inkari ni Savellano.#

Comments are closed.