Footer

Petision taxi operators a manayonan flag down iti P10 denggen ti LTFRB

BAGUIO CITY -Kalpasan a napatgan ti kiddaw dagiti jeepney operators a probisional a mangingato iti plete iti P.50, manamnama a mapatgan met ti kiddaw dagiti taxi operators ditoy a matuonan ti flagdown iti P10.

Naituding a denggen ti Land Transportation and Franchising Regulatory Board (LTFRB) ti petition dagiti taxi operators nga impilada idi Hunio 17 babaen ti maysa a public hearing a maangay iti regional nga opisinana iti malem ti Hulio 18.

Denggen met ti LTFRB ti biang dagiti commuters mainaig iti petision dagiti taxi operators.

No mapatgan ti petision dagiti taxi operators, agbalinton a P35 ti flag down manipud iti P25 a naaprobaran idi pay la 2004.

Iti petisionda, kinuna dagiti taxi operators a saandan a kabaelan nga ibaklay ti nagsasaganad a panagpangato ti presio ti gasolina ken krudo isu a kidkiddawenda ti pannakanayon ti flag down dagiti taxi.

Segun pay iti petision, saanen a makaanay ti matgedanda para kadagiti kangrunaan a kasapulan ti pamiliada iti biag agsipud ta bimmaba iti manipud laengen iti P100 agingga iti P200 idinto a nakaapekto iti naituding a boundaryda ti agtultuloy a panagpangato ti presio dagiti spare parts ken dadduma pay a ramit ti lugan.

Kinuna ti petision a saanen a maibaklay dagiti drivers ken operators ti sasaaden ti ekonomia isu a kasapulan unayen ti pannakaited a madagdagus ti probisional nga increase a kidkiddawenda.

Maipalagip a naipangato ti singir ti plete ti taxi idi pay la Disiembre 2004 no sadino nga inted ti LTFRB ti P25 a flag down iti umuna a 400 a metro ken P1.50 kadagiti sumarsaruno a 200 metro.

Saan a nairaman dagiti taxi iti probationary fare increase a naited kadagiti bus ken public utility jeepneys (PUJs) idi Mayo 18.#

Comments are closed.