Footer

SALAYSAY: Agannad: baka sika ti sumaruno a biktimaen dagiti manangallilaw (Maudi a paset)

Adda pagsasao dagiti autoridad iti sugal, maysa iti maysa a milion ti tsansam a mangabakka iti lottery.

Ngem ti mangabakka iti mamindua a daras iti lottery?

Saan laeng a kasta ti napasamak iti nagsurat. Namitlo daras payen a nangabak iti lottery a nagsaganad! Iti maysa laeng a lottery scam ti pakapasamakan daytoy!

Itay Hunio 28, nakaawat manen toy nagsurat iti email a nangabak iti maysa a milion a doliar babaen ti lottery a naisayangkat itay laeng Hunio 15 nga inesponsoran (manen) ti Microsoft Corporation.

Sakbayna, idi Marso 23th daytoy a tawen, napatulodan toy nagsurat iti email a nangabak iti lottery a nangabakanna iti maysa a milion a doliar nga inesponsoran (kano) ti Microsoft Corporation.

Iti panangamirisko iti surat, madlaw a maymaysa a tao (wenno cell, kas kuna ti website a nagsukisokak) ti naggapuanna. Ti nakaay-ayat, ti serial number (7741137002) a nakairagpinan (kano) ti email address toy nagsurat a nairaman iti paripa ti nakabunotan dagiti “nagasat a numero” a 5-13-33-37-42. Agasem, namindua a rimmuar dagitoy a numero iti paripa a naisayangkat (kuno) idi Marso ken Hunio!

Nupay aggiddiat ti reference number ken batch number a naiyappeng iti email address, nailanad nga iti lottery itay Hunio, ti PB8701/LPRC ti winning number idinto nga iti lottery idi Marso, GB8701/LPRC ti winning number. Nasuktan laeng ti umuna a letra iti sabali!

Agtutunnal dagiti pagilasinan a maysa nga scam daytoy a lottery a nakadakamatan ti nagan ti maysa a respetado a kompania. Ngem ti makadakes, adu dagiti mamati! Dida makita daytoy a modus operandi dagiti manangallilaw.

Rinibribu nga email ti ipatpatulod dagiti scammers. Dua laeng a banag ti kayatda kenka no patulodandaka iti email: ti kuartam ken ti identidadmo.

No nagtalekka a nangited kadagitoy iti scammer, todas ni laing, kasla met laengen inikkam ida iti tali a pangbekkelda kenka.

Mangrugi ti lottery scam babaen ti pannakaawat ti biktima iti email a pakaammuanna a nangabak iti dakkel a gatad iti lottery.

No nasiput ti napatulodan iti surat, ammona lattan a panangloko daytoy.

Kasano a mangabakka iti lottery a dika met gimmatang iti tiket? Ngem nasikap dagiti scammer ket ar-aramatenda  itan dagiti email address a pangbiktima kadagiti inosente. Ibagada a kas paset ti  panangipromotda iti email iti internet, naikkan  amin nga email address iti numerona. Dita (kano) a mabunot ti numerom a pakaitedan ti premio a di nababbaba ngem maysa a milion a doliar wenno Euro.

Ngem adu ti saan a makaammo nga illegal ti lottery kadagiti dandani amin a pagilian. Illegal daytoy a pannakigasanggasat babaen ti numero uray iti United States, Canada, Australia, Great Britain ken dadduma a naprogreso a pagilian malaksid no ti gobierno wenno exempt licensed charitable organizations a mismo ti mangpataray.

Illegal pay ken maikontra iti paglintegan ti United States ken dadduma a nasion a makiripa ti maysa a tao iti aniaman a lottery no saan a residente iti nasao a pagilian. Kas ehemplo, iti Spain, illegal a makisali iti lottery no saan nga Espaniol.

Awan met ti makunkuna a random email lottery. Maikontra iti linteg ti asinoman a mangaramat iti email addressmo nga awan ti permisom ken saan nga aramiden dayta ti maysa a lehitimo a negosio.

Ditoy pagiliantayo, illegal a sugal ti hueteng, maysa a klase ti numbers game. Asinoman a matiliw nga agpusta iti hueteng, makasuan iti illegal gambling. Ngem legal ti kaarngina a paripa, kas iti sweepstakes ken lotto agsipud ta adda dagitoy iti panangimaton ti maysa nga opisina iti babaen ti gobierno.

Kasano a maammuan nga scam ti naawatmo nga email?

No adda naawatmo nga email a mangibagbaga a nangabakka iti lottery wenno ania ditan a paripa, maysa daytoy nga scam wenno panangallilaw no adda dagiti sumaganad:

1. Saanka a gimmatang iti tiket.

2. No saanka nga umili wenno residente iti mapapati a nakaisayangkatan ti lottery.

3. No dawaten kenka ti nagisayangkat kuno iti lottery ti nagan, pagtaengan, pagsapulam, bank account numbermo ken dadduma pay a personal nga impormasion maipanggep kenka.

Dika agdarasudos a mangited kadagitoy nga impormasion ta aramaten la ketdi ti scammer a mangtakaw iti identidadmo. Aramatenna ti naganmo a manglukat iti bank account, lisensia, pasaporte, wenno credit card. Babaen dagitoy a dokumento, gatangenda amin a kayatda babaen ti naganmo a saanda a bayadan. Kamatendakanto dagiti nagutanganda a pagtagilakuan ken banko. Makasuanka pay no adda inaramidda a krimen babaen ti naganmo. Maaramidda amin dagita ta natakawda metten ti kinasiasinom!

 4. No dimo nangnangeg ti nagan ti nagisayangkat iti lottery.

5. No dumawdawat ti nagipatulod iti kuarta. No nangabakka iti lottery, awan ti bayadam iti asinoman iti aniaman a rason. No adda bayadam a buis, iti gobiernom ti pagbayadam babaen ti panagipilam iti income tax returns ket ipatulodmo daytoy a direkta iti gobiernom. Iti sabali a pagilian, aniaman a buis ti inabakmo, maikkat a dagus sakbay nga itedda iti nangabak. 

6. No ibagbaga ti email a mapatulodanka iti cashier’s check wenno bank check a nagtaud iti tao wenno kompania a dimo am-ammo nga idepositom iti bankom ken mangipatulodka iti kuarta a sukat iti nabusbosna iti pannakaproseso ti inabakmo.

No adda simmangpet a tseke wenno bank check, dimo garawen. Sigurado a peke ti tseke. Mabalin pay ketdi a tinnakawan ti tseke ket no idepositom iti naganmo wenno ginastom, naisarsarakkan ken pakatiliwam.

Kasta met a dika agipatulod iti kuarta kadakuada nangruna babaen ti Western Union wenno moneygram ta sigurado a saanmon a mapasubli pay ti kuartam. Umuna, awan ti pakatuntonam agsipud ta dimo ammo ti pakaipatulodanna a lugar ken no asino ti mangpik-ap iti kuarta. No nangipatulodka iti kuarta iti scammer, amusayem laengen ti subsobmo.

Kasano a malapdan ti pannakaallilaw babaen ti email?

1. No adda sumangpet a suratmo a makitam a naggapu iti dimo am-ammo a tao wenno foreign sounding ti naganna, saanmo a luktan ti emailmo. Nasaysayaat pay nga idelitmo sigida tapno maikkaten iti pempenmo.

2. Kadakkelan a pakaallilawan ti maysa a biktima ti iririmbaw ti kinagamrudna, ti ayatna a bumaknang iti dina met nagbannogan wenno nadaras a wagas, uray agdadata nga illegal daytoy. Ikkatem dayta  tapno dika masulisog kadagiti panangallilaw iti email.

Madakamat ditoy nga adu dagiti panangallilaw a saan a nairepreport agsipud ta nakarikna ti biktima iti panagbain ken dida kayat ti mauyaw wenno maumsi gapu iti napasamak.

Maiballakadmi kadagiti nabiktima ti panangireportda ti napasamak kadakuada kadagiti autoridad.#

Comments are closed.