Footer

2 upland municipalities, sinerbian ti KABSAT

SAN EMILIO, Ilocos Sur – Kinuna ni  Mayor Lorenzo Bragado Jr. a dakkel a tulong ti naipaay ti KABSAT kadagiti kakailianna ditoy.

“Nasayaat ta nakitada dagiti pagkasapulanmi dagitoy,” innayon ti mayor idinto a nagyaman iti pannakaidanon dagiti serbsio kadagiti residente ditoy.

Indanon a mismo ti gobierno probinsial iti panangidaulo ni Gobernador Deogracias Victor “DV” Savellano dagiti kiddaw dagiti walo a barangay daytoy nga ken sangapulo ket maysa a barangay ti Lidlidda iti dua nga aldaw a Kakailian nga Agnaed iti Barangay Sangsangkamaysa nga Agrang-ay Tayo (KABSAT) Outreach Program.

Naiwaras itay Hulio 10 kadagiti umili ditoy dagiti hand tractor, kuliglig, water pumps, knapsack sprayers, G.I. pipes, O.B. bags, hose, toilet bowls, grass cutters, BOER a kalding, seedbags, tilapia fingerlings, armchairs, monoblocs, dental chair para iti municipal health unit, sarukod para kadagiti senior citizens, ken saklay para kadagiti disabled.

Naiwaras pay dagiti aid cards para kadagiti 100 kapanglawan a pamilia tapno makaisakadada iti masapulda iti gobierno probinsial ken tulong pinansial nga aggatad iti P6,125 kada barangay.

Nailukat pay ditoy ti Tindahan Natin ti National Food Authority a pakagatangan dagiti residente iti nalaklaka a bagas ken noodles.

Kabayatanna, indawat ni Lidlidda Mayor Jesus Sagay a mausar koma dagiti ramramit nga inted ti KABSAT para iti pagsayaatan ti kaaduan a saan koma a pagpipinnerdianda.

“Buyogantayo iti aramid dagitoy a saan ket nga agpampannuraytayo lattan kadagiti naiyawat,” kinuna ni Sagay.

Naiwaras itay Hulio 11 iti Lidlidda dagiti kuliglig, diesel pumps, corn sheller, hose, school chairs, jetmatic pumps, G.I. Pipes, kitchen utensils, seedbags, BOER a kalding, sarukod para kadagiti nataengan, saklay kadagiti addaan rangkap, nadumaduma nga ag-agas para iti health center, aid card para kadagiti indigents ken P5,000 a financial assistance  iti tunggal barangay.

Nangipaay met ti National Commission on Indigenious People (NCIP) iti puonan para iti panagtalon dagiti agindeg ditoy.

Naisayangkat pay iti dua nga ili dagiti seminar ken panagsanay para kadagiti barangay officials, barangay workers, estudiante ken out of school youth malaksid ti libre a medical ken dental mission ken libre a pangaldaw para kadagiti amin a dimmar-ay.

Impakaammo metten ni Savellano a ti Suyo ti sumaruno a turongen ti KABSAT Caravan.

Indagadag ti gobernador kadagiti agindeg kadagiti ili a danonen ti outreach program ti panag-availda kadagiti agduduma a serbisio dagiti agduduma a provincial offices ken national agencies ta daytoy ti rangtay a mangyasideg kadakuada iti gobierno.#

Comments are closed.