Footer

BANNER NEWS: Task Force Bimmotobot nabuangay a mangpalutpot shabu lab iti La Union

SAN FERNANDO CITY – Maysa a task force ti nabuangay nga agpalutpot mainaig ti naipasdek  a shabu laboratory iti Barangay Upper Bimmotobot, Naguilian, La Union.

Idauluan ni Police Supt. Jane Andres Aunso, regional director ti Philippine Drug Enforcement Agency (PDEA) ti Task Force Bimmotobot.

Kabayatanna, nangisubmite ni Dip. Tomas Dumpit iti resolusion iti Kamara para iti pannakaimbestiga dagiti lokal  nga opisial ti nasao a barangay ken ili tapno mapudasdasan no adda pannakainaigda iti pannakaipasdek ti naraut a laboratorio.

Mismo nga ili ni Dumpit ti nakaduktalan iti nasao a laboratorio ti droga.

Rinaut dagiti nagtipon a bunggoy ti La Union Police Provincial Office nga indauluan ni Provincial Director Senior Supt. Noli G. Taliño ken ti Philippine Drug Enforcement Agency (PDEA) Regional Office I babaen ti panangidaulo ni Aunzo ken ti Naguilian Police Station nga indauluan ni Police Chief Inspector Erwin Dayag, ti nasao a laboratorio a naipasdek iti 11-ektaria a compound itay Hulio 9 ket nakasamsamda kadagiti ramen a maaramat iti panagaramid iti maiparparit a droga.

Kinuna ni Regional Director Police Chief Supt. Romeo C. Hilomen a karaman dagiti sinamsam ti rimmaut a bunggoy ti 24 nga LPG tanks, 52 a siliasi, 80 sako a caustic soda potassium hydrate, 79 barrels nga iodine crystal, 15 barrels  red phosphorous, 65 boxes ethanol, 7 nga industrial jars, respirators ken dadduma a banag a mapapati a maar-aramat iti illegal nga aktibidad.

Inaresto dagiti anti-narcotics operatives da George Cordero, mapapati a mangup-upa iti pagtaengan a nakasukalan kadagiti raw materials ken ramramit, ken da Andy Tangalin ken Dante Tomas Palaganas, caretakers a mangbanbantay iti nasao a laboratorio ti droga.

Naduktalan dagiti rimmaut nga operatiba dagiti raw materials, paraphernalia ken ramramit  a nakapempen iti pagtaengan ni  Saturnino Tangalin, residente ti Barangay Lioac. Nasukalan met dagiti dadduma iti maysa a kueba iti daga ni  Andy Tangalin.

Kinuna ni Taliño a makapartuat dagiti containers  a naglaon iti iodine crystals iti 180,000 kilos a shabu a mapattapatta nga agpateg iti nasurok a maysa a trillion.

Kinuna ni Taliño a daytoy ti umuna a maikurkurimed a laboratorio ti droga a naduk-talan iti La Union ken posible iti sapasap a rehion.

Innayonna a mabalin a patpatarayen daytoy ti maysa a dakkel a sindikato nga adda pannakainbolbarna iti illegal a panaglakuan iti droga.#

Comments are closed.