Footer

Ordinansa a mangipaay insentibo kadagiti traffic aides, naibasura

VIGAN CITY – Imbasura ti sangguniang panlungsod ti ordinansa a mangipaay iti insentibo kadagiti traffic aides ditoy siudad.

Iti daytoy a pangngeddeng ti mayoria iti konseho, kinuna ni Konsehal George Villanueva, proponente, a respetarenna ti desision dagiti kabaddungalanna iti sangguniang panlungsod.

Ngem kinuna ni Villanueva a maikontra iti presumption dagiti padana a konsehal, saan nga eksklusibo a maited ti insentibo a naikabil iti ordinansa para traffic aides.

“Awan ibagbagana diay ordinansa a mapan (insentibo) exclusively  kadagiti traffic aides,” kinuna ni Villanueva bayat ti pannakiinnuman ni Jun Ramos kenkuana iti programana a Barangay Commando Brigada idinto nga inyunay-unayna nga adda iti discretion ti chief executive ti pannakaited ti insentibo.

“Siguro, kasdiay ti presumptionda ta ti ngamin paggapuan ti pundo, naggapu iti multa dagiti traffic violations iti siudad ti Vigan,” kinuna ni Villanueva.

Kinuna ti konsehal a “saantayo met a maobligar ni Apo Mayor a mangited iti insentibo…” idinto nga inyunay-unayna nga adda koma pangalaanna iti pondo no kas pagarigan adda makitana a deserving nga empleado a maikkan iti insentibo.

Maipalagip nga iti session idi Hulio 7, naaprobaran iti maikadua a pannakaibasana  ti proposal ni Konsehal George Villanueva a nakailanad iti ordinansa a maipaay kadagiti traffic aides manipud iti makolekta a multa dagiti motorista ken traysikelan a naglabsing iti trapiko ti 50% para iti seminar ken panagsanayda, tulong iti salun-at, aruaten ken transportation assistance ken 50% para iti insentibo wenno  tulong pinansial ken dadduma pay.

Ngem kinontra ni Konsehal Everin Molina ti proposal ket kinunana a saan a nasayaat a kitkitaen nga adda kuarta a maipaay kadagiti traffic aides agsipud ta saan a malapdan a rummuar ti saan a nasayaat nga impresion nga agtiliw dagitoy tapno adda pagbibingayanda.

Nupay kasta, naaprobaran ti proposal iti panagbubutos dagiti konsehal.

Iti naglabas a session,  takder ni Villanueva a kasapulan unay ti insentibo para kadagiti traffic aides ta narigat ti obligasionda ket uray napigsa ti tudo ken napudot ti tiempo, addada nga on-duty, saan a kas kadagiti empleado ti gobierno ti siudad nga agtrabahoda iti aircon nga opisina.

Ngem gapu ta kiniddaw  ni Konsehal Hermenigildo Apelin a kasapulan a nominal voting ken mangegan ti takder ti kada konsehal iti nasao a proposal iti maikatlo a pannakaibasana idi Hulio 14,  saan a pimmasa daytoy gapu ta saan a kinanunongan da Konsehal Agdamag, Molina, Adriatico, Apelin ken Verzoza idinto ta da laeng Villanueva, Formoso ken Alves ti pimmabor. Awan da Councilor Lourdes Baquiran, ABC Fed. Pres. John Patrick Singson ken ti SK Fed. Pres. Pajaro  gapu ta napanda iti Thailand.

Kinuna ni Konsehal Apelin  a dakkel unay ti 50% nga insentibo agsipud ta maibasar iti nakolekta manipud iti multa idi 2007, agdagup iti  nasurok P462,000.00.

Kinuna ti konsehal nga  imbes nga adda insentibo nasaysayaat laengen no manayonan ti empleado ti traffic division.

“Ammok met a daytoy a konseho maysa a collective body ket siempre, agturay ti mayoria,” kinuna ni Villanueva, sana innayon a “no naabakka, akseptarem.”#

Comments are closed.