Footer

P400,000 student assistance fund, maipaima iti ISCC

BANTAY, Ilocos Sur -Saanen a kasapulan nga agparikut dagiti awan pagbasana  nga estudiante ti Ilocos Sur Community College ditoy ta adda ipautang ti Commission on Higher Education (CHED).

Kinuna ni ISCC Administrator Carmencita Reyes-Paz nga adda P400,000 nga inlatang ti Commission on Higher Education para iti Ilocos Sur Community College tapno adda maipautang kadagiti estudiante ditoy nga agkasapulan.

“Maipangruna a maka-avail itoy a  programa dagiti third, fourth ken fifth year students kadagiti CHED Priority Courses kas iti HRM, tourism, midwifery ken information technology,” kinuna ti administrador.

Ti nadakamat a gatad ket paset ti programa ti national government nga Student Assistance Fund For Education (SAFE Loan) para iti school year 2008-2009.

Iti surat ti CHED  ken ni Paz, makautang ti maysa nga estudiante iti agingga iti P8,000 para iti tuition fee, school fee, libro, course projects, thesis writing, board and lodging, graduation fee ken dadduma pay a kasapulan ti pagadalan.

Kasapulan laeng a maipakita ti bumulod dagiti requirements, addaan daytoy iti full semestral load kas ituyang ti curriculum ken kasapulan a malpasna iti husto a tawen ti kurso. Bayadan met ti masublat iti uneg ti dua agingga iti uppat a tawen babaen ti 0% interest rate.#

Comments are closed.