Footer

Rebel returnee a pimmatay iti agkabsat, napilaan iti kaso a double murder

LAOAG CITY – Napilaanen iti kaso a double murder ti maysa a rebel returnee a kangrunaan a suspetsa iti pannakapapatay ti agkabsat iti Barangay San Isidro, Bangui ditoy a probinsia.

Napilaan ni Christopher Agoo, rebel returnee, iti kaso a double murder gapu iti pannakapapatay da Julius Castillo Cascayan, 42, ken Agosto Castillo Cascayan, 27, agpada a naasawaan ken agpapaay a drayber ni Pagudpud Mayor Marlon Sales ken ti kabsatna a ni Bangui ABC Pres. Joseph Sales.

Napaltogan dagiti agkabsat iti sardam ti Hulio 16 iti kangitingit ti Bagyo Helen iti uneg ti balayda iti Barangay San Isidro, Bangui, Ilocos Norte.

Segun iti inbestigasion ti polis, kasangsangpet ni Julius idi pinaltogan ti suspetsa ngem nakataray ti biktima a simrek iti pagtaenganda.

Sinurot ti suspetsa ti biktima sana pinaltogan a nakaigapuan ti dagus nga ipapatayna.

Immarayat ni Agosto ngem insaruno a pinaltogan ti suspetsa iti ulona a nakatayanna met a sigida.

Nakarekobre dagiti polis iti 3 a nagawangan a bala manipud iti armalite M16 iti nakapasamakan ti krimen.

Segun kadagiti inbestigador, nagramut ti pammapatay iti personal a susik iti nagbaetan dagiti biktima ken ti suspetsa.

Mapapati a ti akusado ti akinkukua iti lugan a nakailuganan dagiti kayo nga  illegal a naibiahe ket ni Julius Cascayan ti maysa kadagiti miembro ti task force a nangisayangkat iti operasion.

Dati a rebelde ni  Agoo  ngem nagsubli iti salinong ti turay idi 1992.#

Comments are closed.