Footer

BANNER NEWS: Mannalon, nagreklamo panangipangato dagiti fertilizer dealers iti lakoda

SAN FERNANDO, La Union – Agparparang nga awan met la ti serbi ti fertilizer subsidy a naited kadagiti mannalon gapu iti kellaat a panangipangato dagiti naakreditan nga aglako iti abuno iti presio daytoy a tagilakoda.

Nagsasaruo dagiti reklamo iti opisina ti agriculture regional director ditoy ken kadagiti provincial agriculture offices gapu ta imbes a mapalag-ananda iti impaay ti gobierno a P250 fertilizer subsidy iti abuno babaen dagiti kupon a naiwaras kadakuada, agparparang nga awan ti serbi daytoy agsipud ta impangato met dagiti accredited fertilizer dealers ti presio ti lakoda a ganagan manipud iti P1,850 kada sako iti P2,100.

Tapno matulongan dagiti mannalon gapu iti panagngina iti ganagan, nangipaay ti nasional a gobierno iti P250 a fertilizer subsidy babaen ti naiwaras a kupon nga isakada dagiti mannalon no gumatangda iti abuno.

Ngem iti daytoy nga inaramid dagiti fertilizer dealers, bale awan met laengen ti naited a subsidy kadagiti mannalon.

Kinuna ni Ilocos Sur Provincial Agriculturist Teofilo Quintal a pambar dagiti fertilizer dealers ti agtultuloy a panagpangato ti presio ti produkto petrolio iti panangipanginada iti lakoda ta ngimmina met ti pagbayadda iti transportasion dagitoy.

Ngem rason dagiti dealers pinatonganda iti P250 ti presio ti lakoda a ganagan agsipud ta  saanda makasingir  a dagus iti subsidy ti DA.

Kanaig daytoy, kinuna dagiti nagreklamo a mannalon a nasaysayaat laengen a gumatangda iti ganagan a saandan nga agaramat iti kupon ta awan met la ti serbida.

Kas sungbat ti ahensia, inwaragawag ni DA Regional Director Cipriano Santiago  bayat ti Regional Development Council Consultative Meeting a naangay itay Hulio 21 ditoy  tinabunuan dagiti nadumaduma a sektor a pakairamanan ti agrikultura a  nasaysayaat no saanen nga usaren dagiti mannalon dagiti naited kadakuada a discount coupons tapno maawanen ti parikut.

“Gumatangkayo iti uray anian a fertilizer dealer tapno maalayo ti P1,850 kada sako. Dawatenyo ti resibo ket isun ti ipakitayo iti opisina ti DA ket isublimi ti P250 a kas subsidy iti tunggal sako,” kinuna ni Santiago

  Indagadag ni Gov. Deogracias Victor  Savellano, RDC Chairman, a panawenen nga agusar dagiti mannalon iti organic fertilizer.

Dinawat ti gobernador iti DA a sursuruanda dagiti mannalon no kasano ti agaramid iti organiko a ganagan tapno makeltay iti panagdependeda iti inorganic ken komersial a ganagan.

Kinuna ni Savellano a malaksid a malakaan dagiti mannalon iti gastos ti panagtalon, makatulong pay ti panagusar iti organic fertilizer tapno mapasubli dagiti napukawen a nutrients ti daga.

Nupay kasta, kinuna ti gobernador a saan  a kasapulan a gulpien daytoy ngem ketdi, in-inut a paaduenda ti usarenda nga organiko a ganagan iti tunggal panagmulada.

Kabayatanna, inreport ti DA nga addan 3.11 million metric tons nga irik a naapit ti Rehion I manipud Enero agingga iti Hunio, nababbaba iti 1.6 million metriko tonelada iti target ti ahensia a 4.7 million metric tons nga apit ti rehion para iti 2008.(Mancielito S. Tacadena/NBN Vigan)

 

Comments are closed.