Footer

Chinese Consulate, nagidonar iti liblibro

VIGAN CITY – Agduduma a libro ti Chinese language, literature, culture, festivities ken dadduma pay a makatulong iti panagsursuro iti Chinese Mandarin ti libre nga inted itay nabiit ti konsulada ti  China  a nakabase iti Ilocos Norte iti Ilocos Sur Community College ditoy babaen ken ni Chinese Consul Chen Li Ping.

Paset pay laeng daytoy ti pannakaisuro ti lengguahe a Chinese iti nasao a pagadalan babaen ti Provincial Education and Youth Affairs Special Programs and Extension Services.

Segun ken ni sigud a bokala Anne Morales,  mangtartarawidwid iti programa, maysa a wagas ti pannakaisuro ti    Chinese language tapno matraining dagiti estudiante  ket agbalin a daytoy a kas maysa a subject dagiti estudiante.

Walopulo nga oras ti maited kadagiti estudiante tapno malpasda ti Chinese course.

Kinuna ni Morales a babaen ti pannakaisuro ti Chinese language iti ISCC, maingato ti human resource ti Ilocos Sur ken makisabay iti globalisasion dagiti aggraduar iti ISCC. Madama metten ti pannakaur-urnos ti iskediul ti posible a pannakailukat ti kurso kadagiti agbasbasa iti probinsia nupay saan dagitoy nga estudiante ti ISCC kasukat ti tuition fee a bayadanda.

Kinuna met ni Chinese Consul Cheng Li Ping a dakkel a benepisio para iti ISCC ti pannakaisuro ti Mandarin Chinese ditoy agsipud ta agbalin a bentahe kadagiti estudiante aglalo ita ta am-ammon ti pagilianda a China iti benneg ti negosio ken panagtagilako.

“Ti gobierno ti China ti mangibaklay iti sueldo ken allowances dagiti dua a Chinese teachers,” impalgak pay ti consul.

Agtalinaed ditoy probinsia iti uneg ti makatawen dagiti mangisuro ngem mabalin pay maiyalud-od no adda kiddaw manipud iti  gobierno ti Ilocos Sur. (Mancielito S. Tacadena/NBN Vigan)

 

Comments are closed.