Footer

Mapapati a pannakairamanda iti shabu lab; COP, narelibo, 3 polis maimbestiga

SAN FERNANDO CITY – Imbilin ni PNP Chief Avelino Razon Jr., iti Criminal Investigation and Detection Group ti naun-uneg a panagimbestigada mainaig iti naraut a shabu laboratory iti Barangay Upper Bimmotobot, Naguilian, La Union idi Hulio 9.

Kinuna ni Razon a saanna a palabsen dagiti polis nga agsalungasing iti linteg imbes nga isuda ti law enforcers idinto a pinadaywanna ti PDEA ken dagiti operatiba iti rehion a nangraut iti nasao a laboratorio ti droga.

Imbilinna nga asistaran ti CIDG ken IG ti PRO1 tapno “mapakatan dagiti amin a PNP personnel a mabalin nga adda pannakainbolbarna iti operasion ti shabu laboratory.”

Narelibo iti puestona ti hepe ti polis iti Dagupan City gapu iti mapapati a pannakairamanna iti pannakaipasdek ti naraut a laboraorio ti droga.

Tallo pay nga opisial ti PNP  a nakadestino iti Police Regional Office a nakabase iti Camp Oscar Florendo iti San Fernando City ti maim-imbestiga gapu iti mapapati a pannakairamanda iti operasion ti droga iti nasao a lugar.

Ngem imbatad ni Supt. Dionicio Borromeo a malisioso ti pannakaisab-it ti naganna iti naraut a shabu lab iti La Union idinto nga innayonna a sisasagana a sumango iti inbestigasion tapno masungbatanna dagiti alegasion ken madalusan ti naganna.

Rinaut dagiti nagtipon a bunggoy ti La Union Police Provincial Office nga indauluan ni Provincial Director Senior Supt. Noli G. Taliño ken ti Philippine Drug Enforcement Agency (PDEA) Regional Office I babaen ti panangidaulo ni Aunzo ken ti Naguilian Police Station nga indauluan ni Police Chief Inspector Erwin Dayag, ti nasao a laboratorio a naipasdek iti 11-ektaria a compound itay Hulio 9 ket nakasamsamda kadagiti ramen ken ramramit a maaramat iti panagaramid iti maiparparit a droga a mapattpatta nga agpateg iti maysa a trilion a pisos.

Kuna dagiti autoridad a ti naraut a shabu lab ti kadakkelan iti intero a rehion no di pay iti sibubukel a pagilian.

Naaresto iti raid da Andy Tangalin ken Dante Tomas Palaganas ken George Cordero a mapapati a mangup-up iti nasao a pagtaengan.

 Narelibo ken naiyalis iti Camp Crame ni Borromeo kalpasan ti panangikalam-it kenkuana ni Dante Tomas Palaganas nga isu ti protektor iti nasao a laboratorio. Sinuktan ni Sonny Verzosa nga acting chief of police.

Mapapapati a dati a police asset ni Borromeo ni Palaganas idi isu pay ti hepe ti regional mobile group iti Ilocos Region.

Kanaig daytoy, tallo pay a junior officers a nakabase iti PRO1 ti maim-imbestiga iti pakainaiganda iti operasion ti droga iti rehion.

Ngem kinuna ni  PDEA regional director Jane Andres Aunzo, ken agdama nga assistant commander ti nabuangay a Task Force Bimmotobot  a di pay mailatak ti naganda ta premature pay laeng bayat ti pannakaisayangkat ti inbestigasion.

Kabayatanna, impalgak ni Chief Supt. Ramon Gatan, commander ti task force, nga ammodan ti maintainer ti shabu lab.

Kinuna ni Gatan a madama ti pannakainbestiga ti background ti nasao a tao a dina pay kayat nga inaganan.#

 

Comments are closed.