Footer

Narvacan, kalawaan ti namulaan iti hybrid rice

NARVACAN, Ilocos Sur – Kinuna ni municipal agriculture officer Condrado Molina, a nakurang nga uppat a gasut nga ektaria ti namulaanda iti hybrid rice iti daytoy nga ili ita a tawen.

“Umabot iti 367 nga ektaria ti rinaepanmi iti hybrid rice iti daytoy a panagtatalon, nadoble manipud iti targetmi a 165 nga ektaria iti daytoy a tawen,” kinuna ni Molina iti interbio kenkuana ti DZTP itay nabiit.

Kinuna ni Molina nga iti pattapattana, ti Narvacan ti kalawaan iti naraepan iti hybrid rice iti daytoy a panagtatalon.

Innayon ni Molina a bulan pay laeng ti Pebrero ken Marso, nagturongdan kadagiti barbarangay ket inlungalongda daytoy a programa agsipud ta dakdakkel ti maapit iti hybrid rice no ikumpara kadagiti dadduma a variety wenno klase ti maibunubon nga irik nangruna ita a panawen a simmuyop ti presio ti bagas iti world market.

Kinuna ni Molina nga umabot koma iti 400 nga ektaria ti mamulaanda iti daytoy a tawen no adda umanay a suplay ti hybrid dagiti agparpartuat ti nasao a bukel.

Maysa a programa ti gobierno ti hybridization program tapno mapaadu ti apit dagiti mannalon.

Kinuna ti municipal agriculturist a makagatang dagiti mannalon iti hybrid rice iti nalaklaka a presio babaen ti subsidy program. 

Kinunana nga idi damo, P1,000 ti maikkat iti presio dagiti gatangen dagiti mannalon, ngem idi nangrugi idi Mayo 1, P1,500 ti naikkaten. (Danny Antalan)

Comments are closed.