Footer

SALAYSAY: Credit card scam, agannad

Saanen a kabarbaro daytoy a damag, nabayagen nga agraraira isuna laeng ta nagduduma a rupa ken wagas iti panagballaibo. Iti agdama, nagraira metten ti credit card scam, isu a nasken iti panagannad.

Credit card scam. Saan  laeng a daydiay panangaramat iti napukaw wenno ginagara a tinagikua a credit card no di pay karamanen ditoy ti panangkopia kadagiti dulin a koda para iti bukod a panggep ken pagimbagan. Ita, kabaruanan nga isyo ti panangaramat iti impormasion nga inted wenno insubmitar iti provider para iti bukodna a pagimbagan.

Itay nabiit, nagpatulong iti National Bureau of Investigation (NBI) ni Blanca Grace Songco gapu iti pannakaaramat ti naganna iti panagaplay iti kagudua a million a credit line. Nasdaaw ta adda metten simmangpet kenkuana a credit pin. Idi bineripikana daytoy, natakuatanna a nakapirma ti naganna ken adda pay SSS IDna a nakaatats iti impormasion. Impalawag ni Songco nga awan iti pinirmaanna a kasta nga aplikasion. Isu a nagpatulong iti NBI tapno makemmeg ti nalaing a con-artist. Addan iti pagbaludan ti con artist.

Maliklikanyo dagiti sigalut iti credit card babaen ti panagannad. Maisingasing ti panangberipikayo a nalaing no lehitimo met laeng ti credit card representative ti bank provider. Adu ngamin ita dagiti agibagbaga wenno mangibagbaga a kunada a kamengda iti maysa nga organisasion wenno representante iti credit card. Saankayo koma a dagus a mamati kadagiti nasam-it a balikasda. Nasken ti panangberipikayo iti mismo a bangko ti kinaasinoda.

Agpayso, adda dagiti lehitimo a representante ngem adda met dagiti bogus. Tapno malapdan ti indulto, nasken ti panagannadyo tapno saan a maitulad ken ni Songco. Saanyo koma  a bastabasta ited dagiti balido  nga  impormasion mainaig iti biagmo lalo no dagiti nakapuesto kadagiti mall, supermarket, ken iti bangketa ti pagpirmaanyo.

Adda pay dagiti sumagmamano nga umawag iti telepono. Iti naminsan, adda immawag kadakami  iti telepono ket adda pay inyupreserna a  P50,000 free insurance. Dinamagmi  no sadino a banko ti pagpapaayanna, no ania ti naganna. Idi imbagana dagiti kayatmi a maammuan, imbagami nga  umawagto  kalpasan ti lima a minutos ta awaganmi pay ti banko a pagpapaayanna ta  paneknekanmi ti kinaasinona. Kellaat lattan nga imbabana ti telepono. Iti kasomi, nagduaduakami a dagus gapu ta idi dinamagmi no kasano a naammuanna ti kinaasinomi, awan ti nalawag a sungbatna.

Nupay adu dagiti pagsaayaatan ti credit card, nasken met ti panagannadmo iti panangaramat ken panagaplay itoy a banag. Piliem koma a nalaing dagiti pagaplayan. Beripikaem nga umuna ti kinabalido ti representante tapno saanka a maisagmak.

Ket no maikutamon ti credit card, annadam,  saanmo a pukawen. Idulinmo a nasayaat  tapno saan a mapukaw. No napukawmo ket naiggaman ti saan a nasayaat ti panagpampanunotna a tao,  iyutangnaka ket kapilitan a sika ti agbayad ta credit cardmo ken naganmo ti inaramatna.

Annadam met kadagiti papanam a hotel, restawrant ken dadduma pay a negosio-establisimiento a pangaramatam iti credit cardmo. Paliiwem a nalaing ti kahera ta addan dagiti agkopia kadagiti  pin. Itoy a kaso, masdaawkanton no apay nga  immadu metten ti utangmo wenno adda dagiti bayadam a saanmo met nga inutang.   

No nakopia ti credit pinmo, madlawmo laengen dagiti posible a mapasamak iti rekordmo: nabaliwan ti adresmo, nabaliwan a naganmo, dimo am-ammo ti employer, baro ti accountmo a dimo met linukatan, ken nagadu ken saan a  maawatan a credit inquiries.  No makitam nadlawmo dagitoy iti accountmo, adda la ketdi sabali a tao a mangar-aramat iti kinaasinom wenno identitadmo. Isu a kasayaatan ti regular a panangrepasom iti accountmo.

No adda nadlawmo, dagusem ti agpatulong iti NBI Anti-Fraud and Computer Crimes Division. Kaso a panaglabsing iti Republic Act 8484 wenno Access Devices Act ti maitutop nga idatag a kaso kontra iti naglabsing.

Iti ababa a pannao, babaen ti panagannad, maliklikam ti pannakabiktimam kadagiti manglokloko a tattao.#

 

Comments are closed.