Footer

SALAYSAY: Donasionmo a dara, pangsalbar iti biag

Malaksid a  bulan ti nutrision ti Hulio, inkeddeng ti Departamento ti Salun-at nga iti daytoy a bulan ti pannakaselebrar ti nasaknap a programa ti gobierno a National Blood Donors Month. Nasaknap koma ti suporta ti sibubukel nga umili a maipaay itoy programa a panagidonar ken panagurnong iti dara tapno adda madagdagus a maaramat iti panawen a pagkasapulan. Ti dara ti puon ti biag. Ket ti panangidonar iti uray sangkabassit laeng a dara,  kaipapananna ti panangtulong iti agkasapulan ken panangsalbar iti biag.

Nasken ngarud a tumulongka iti padam a tao nga agkasapulan tapno inton sika ti makasapul ket sidadaaan met nga adda madagdagus a tumulong kenka. Makipartisiparka, makiraman ken makitinnulongka ngarud itoy a programa babaen ti panagidonarmo iti dara.

Babaen ti Republic Act 7719 wenno maaw-awagan iti  National Blood Services Act of 1994 ti mandatos itoy a programa: “An act promoting voluntary blood donation, providing for an adequate supply of safe blood, regulating blood banks, and providing penalties for violation thereof.”

Ania ti pagsayaatan daytoy a programa? Dakkel la unay ta maipromot ken maguyugoy ti asinoman nga agidonar.

Maysa a naintaoan nga aramid ti panangidonar iti dara.  Babaen ti blood donation, maaddaan iti bangko ti dara a natalged, nadalus ken nalaka ti balorna iti panawen a kasapulan unay.

Maipakaammo iti publiko a saan a napeggad ti bulontario a panagidonar iti dara. Nataltalged ken nadaldalus dagiti dara manipud kadagiti nagdonar ngem kadagiti magatang kadagiti commercial blood banks ta ngamin adda masursurot a sientipiko ken propessional nga standards para iti  operasion ti blood collection units ken blood banks/centers iti pagilian.

Ti kapipintasan amin  iti panangsuporta itoy a programa ken panagdonar iti dara, no sika ti agkasapulan, nalaka laeng a makaalaka iti dara ta nakalista ti naganmo a kas maysa a donor. Gapu ta donorka, timmulongka, ngarud, adu met ti tumulong kenka.

Iti probinsia, nakapaminliman a nagidonar ni Gob. Deogracias Victor “DV” B. Savellano iti darana. Uray ni Bise Gobernador Jerry Singson nagidondonar met iti darana. Isu nga awan ti pagduaduan iti kinapateg ken kinatalged ti agidonar.

Iti naangay a “blood letting” iti kapitolio ti Ilocos Sur idi napan a tawen, ti mismo nga ama ti probinsia ti kaunaan a nagidonar iti darana, sa simmaruno dagiti  opisial ken empleado manipud kadagiti nadumaduma nga ahensia ken opisina ti probinsia.

“Agbalin koma a modelo daytoy nga addang ti probinsia kadagiti munisipio ken barbarangay tapno mangisayangkatda met iti blood letting,” kinuna idi ni Gob. Savellano.

Kinuna met ni Myrna Caranto, pangulo ti Laboratory Department ti Gabriela Silang General Hospital, a dakkel unay a tulong kadagiti umili ti dara a naalada manipud iti naisayangkat a blood letting program ti probinsia ta saan laeng a dagiti pasiente ti Gabriela Silang General Hospital ti suplayanda iti dara no di pay dagiti amin nga ospital iti probinsia, adda man iti benneg ti pribado wenno gobierno ken uray pay iti probinsia ti Abra.

Idi Hulio 8, indauluan manen ni Gob. Deogracias Victor "DV" B. Savellano ti blood donor program sadiay Brgy. Montero, Banayoyo. Nagtema ti nasao a programa iti “Dara Voluntario, Biag Salbarentayo” (DVBS) ken kas kanaig a paset ti outreach program ti KABSAT (Kakailian nga Agnaed iti Barbarangay Sangsangkamaysa Agrang-ay Tayo).

Kinuna ni Provincial Board Member Gerardo R. Lahoz, chairman ti committee on health, a kasapulan unay ti bangko ti dara gapu iti manamnama nga idadakkel ti bilang ti kaso a dengue iti panawen ti katutudo. Agkasapulan iti madagdagus nga adu a dara dagiti agsakit iti dengue. Agbunga iti patay ti pannakaitantan ti pannakaiyalison ti dara iti biktima ti dengue.#

 

Comments are closed.