Footer

SARITA: NGEM AYAT TI KANGRUNAAN ITI AMIN (Maudi a paset)

“Dimo magayyem ti ayup babaen ti kinadamsak,” kinuna ni Mang Berto.

Napanganga ni Marco. Inyibbusna a sinusop ti naisupot a softdrink. Minulagatanna ti mamon iti iggemna a supot. Imbulsana iti diaketna a maong ta itednanton a kanen dagiti annakna. Minulagatanna ti poste a nakaisuratan ti Daisy Alley.

“Dayta a balay ti yan ti naganak nga aso, saan?”

“Wen, Mang Berto…” nakarikna ni Marco iti pagpeggadan ket inkeddengna nga ipusen ti kartero. Nalaka aya?

“Makigiddanka kaniak.  Dika sumalipengpeng!”

“Kakaisuna a pantalonkon daytoy, Mang Berto. Narigaten!”

Kinatawaan ti kartero. Nagpukkaw: “Divina del Rosario, surat !” Impidua pay ti kartero ti nagpukkaw.

Dagiti uken a tumanaul nga umasideg ti immuna a nangngeg ni Marco. Pagammuan, nailukat ti ruangan. Rimmuar ni Blackie nga agkalkalawikiw ti ipusna. Ngem pagammuan ta nagsardeng daytoy idi nakitana ni Marco. Nagngernger. Kasla kayatna a darupen ni Marco.

“Blackie, no!” inasitgan ni Mang Berto ni Blackie ket inaprosanna ti ulo ti an-anakan. Kinagat ni Marco ti dilana. Imbalakad ni Betty a di kano agtaul ti aso no kagaten ti dila. Kasla naidarekdek iti nagtakderanna.

Agngerngernger pay laeng ti aso a mangtaltaliaw ken ni Marco uray no ap-aprosanen ti kartero. Lumagidlagiden dagiti uken kadagiti saka ti kartero.

“M-mang Berto, ta-talaga a kaguranak….” arigna di sumngaw ti timek ni Marco gapu iti tigergerna. Agluloken ti tumengna. Nalaka aya ti makagat manen?

“Addan sa sobram a mamon. Pirpirsayem nga ited kadagiti uken!”

Nagdardaras ni Marco a nagtungpal. Pinirpirsayna ti dua a mamon ket impuruakna kadagiti uken.

“Kitaem, nakaay-ayat ti panaginnagawda, saan? Kasla maragsakanda unay!” nagkatawa pay ni Mang Berto.

Intugaw ti ina nga awan ti timekna, nalabit maragsakan met ngata a mangbuybuya kadagiti ukenna a mangmangan. Ginudua ni Marco ti maysa pay a mamon ket impuruakna iti sango ni Blackie. Nagpaliiw.

Inang-angot ti aso ti pisi a mamon. Tinaliawna ni Marco. Nakipinnerreng nga umuna ti aso sakbay a kinittabna ti mamon.

“Itedmo aminen. Total teddam met laeng dayta…”

“Wen, Mang Berto,” pinirpirisay manen ni Marco ti maysa a mamon ket intedna kadagiti uken.

“Kayat sa pay ti inada.”

Pinisi ni Marco ti nabati a kagudua.

“Dimo ipuruak!” inyatipa ni Mang Berto.

“Ha? Ania ngarud ti aramidek?”

“Yawatmo a…!”

Pinerreng ni Marco ti kartero. “Awan ti pagkammetkon no kua, Mang Berto! Di nakainsiur dagiti ramayko.”

“Dimo ipakita a mabutengka. Tapayaem nga ited.”

Tinapaya ni Marco ti mamon. Napatilmon ta naguyaoy ti dila ti naganak a mangperperreng kenkuana.

“Common, Blackie! Eat!” binagi ti kartero ket inaprosanna ti tuktok ti aso a nakatugaw.

Nagsardeng pay nga immanges ni Marco idi angot-angoten ni Balckie ti mamon. Tinaliawna pay naminsan ni Marco sana inin-inayad a kinagat ti mamon. Indissona, tinaliawna manen ni Marco, sana kinittab.

“Very gentle pay kuno ti panangawatna!” naggarakgak ti kartero.

Nakanganga ni Marco a nangkudkod iti saan met a nagatel a tuktokna.

“Iggamam ti tuktokna….”

“A-ania? Susmariosep!”

“Iggamam! Dika agbuteng. Apro-aprosam.”

Saan nga immanges ni Marco a nagrukob bayat nga in-inut nga inyasidegna ti kanawan nga imana iti aso nga agngalngalngal. Ti tammudona ti immuna nga indissona iti ulo ti aso tapno paliiwenna ti rikna ti aso. Tinaliaw ti aso. Kellaat nga insanud ni Marco ti imana.

“Dika kadi agbuteng!” kinatawaan ti kartero a lakay, “Ulitem!”

Inulit ni Marco.

“Aprosam a!”

Inaprosanna.

“Apro-aprosam samo arakusen ti tengngedna!”

Nagtungpal ni Marco. Immisem idi situtulok ti aso. Immasideg met a naglagid kadagiti sakana dagiti uken.

“Dayta ti anting-anting a sapsapulem!” nagkatawa ni Mang Berto.

“Adda suratko, Mang Berto?” timek ti babai.

“Notice ti money order, Viring…”

Nagsabat dagiti mata da Marco ken ni Viring nga umas-asideg.

“Di met sika daydiay meter reader a kinagatna idi naminsan?” minulagatan ni Viring ni Marco a nakamasngaad a mangap-apros iti ulo ti naganak.

“Wen. Naamo met gayam toy asoyo!”

“Wen man!”

Nagsabat dagiti mata da Marco ken ti kartero.

“Ti ammona, ket adda  anting-antingko ta apay kano a saandak man laeng a taulan dagiti aso ditoy lugaryo,” kinuna ni Mang Berto.

Nagkatawa ketdi ti babai a nangawat iti notbok sa nagpirma.

“Idinto ta isuna ket kagatenda,” kinuna manen ti lakay ket inyawatna ti notice ken ni Viring.

“Narungsot man nga ayup, no pariknaam iti ayat, aggayyemkayo a…!” imbales ni Viring sana inubba ti maysa kadagiti uken.

Nagsabat dagiti mata da Viring ken ti kartero idi napaliiwda ni Marco a timmakder, agsaringgayad iti dapan ti isemna a manglanglangit idinto a kinudkod ti kanawanna ti di met nagatel a tuktokna.

“Nakatuknon sa met iti atang ti kaduamon?” inggarikgik ni Viring.

“Marco…?” immusiig ti kartero. Inulitna.

Ngem saan a simmungbat ni Marco ta tumaytayab ti mugingna iti masakbayan: no saan nga agkibaltang wenno makibiangot dagiti politiko, superbisorton kalpasan ti tallo a tawen!

“Agasem…!” naiyesngaw met laeng ni Marco ket nagkatawa.

“Agasem ti…?” immusiig ni Mang Berto.          

“Agasam ti kinagat ni Blackie?” naggarikgik ni Viring ket nakangangan dagiti uken ken ti inada a mangtangtangad kadakuada nga agkatkatawa…#

 

Comments are closed.