Footer

Tawid dagiti il-ili iti probinsia, maidokumento

VIGAN CITY – Kinuna ti maysa nga autoridad iti kultura a kasapulan ti panangited iti paset ti kinatao tapno masalbar dagiti “tawid” daytoy a siudad.

Daytoy ti inyunay-unay ni Prof. Eric Zerrudo bayat ti panangrugi ti cultural mapping workshop tapno mailista dagiti amin a natural, built, intangible heritage ken dagiti nalatak a personalidad a pataud ti tunggal ili ti Ilocos Sur.

Kinuna ni Zerrudo a naipangruna a gapu ti kaddada ditoy siudad tapno isuroda dagiti teknik para iti naannayas a panagidokumento.

Babaen ti initiatibo ti lokal a gobierno ti Ilocos Sur ken iti pannakitinnulong ti University of Sto. Tomas-Center for Conservation of Cultural Property and Environment in the Tropics, nairugi  idi Hulio 14 itoy a siudad ti innem a lawas a cultural mapping workshop tapno mailista dagiti amin a natural, built, intangible heritage ken dagiti sikat a personalidad a naggapu iti tunggal ili ti Ilocos Sur tapno makompleto dagiti pagkurangan ti pakasaritaan ti probinsia.

Agpaay a kas speaker iti seminar nga agpatingga iti maudi a lawas ti Agosto da Prof. Arnold Azurin ken Prof. Eric Zerrudo.

Iti umuna a dua a lawas, maisalang iti seminar phase dagiti delegado manipud iti amin nga ili ken siudad ti Ilocos Sur. Mapilinto kalpasanna dagiti 25 nga agbalin a cultural mappers nga agdalan iti sabali pay nga uppat a lawas a panagsanay sakbay a maisalangda iti field work phase a no sadino a danonenda dagiti lugar nga ayan dagiti nailista a heritage (tawid) iti tunggal ili. Dagiti saan a mapili, agsublida iti lugarda ta isuda ti agilista kadagiti maidokumento ken isudanto man met laengen ti manguyog kadagiti cultural mappers kadagiti insuratda a disso.

 Manamnama met a mairugi ti pannakaimapa dagiti napateg a heritage ti tunggal ili iti umuna a lawas ti Setiembre.

Kinuna ni Zerrudo rumbeng a gundawayan dagiti LGUs ti workshop ta apaman a malpas daytoy, maikkan iti sertipiko dagiti partisipante iti umuna a dua a lawas idinto a diploma a kaasping ti masteral ti maited kadagiti mapili a cultural mappers.

“No sadiay Manila, sigurado a nangina ti tuition fee ngem  libre ditoy, isu a masapul a diyo palabsen daytoy nga oportunidad,” kinuna ti propesor.

Innayonna a no ad-adu dagiti partisipante,  napimpintas ti team effort a kasapulan iti daytoy a workshop.

“Dakayo ti makaammo kadagiti lugaryo, ad-adda a pudno ngarud dagiti ilistayo ngem iti pugpugtuanmi,” kinuna pay ni Zerrudo.

Kinuna ni Zerrudo a “no interesadoka iti pannakapreserbar dagitoy a “heritages”, kaslaka metten nagbiag iti napapaut ngem iti “life spanmo” gapu ta napadasam ti nagbiag iti napalabas ken makatulongka a mangiyallatiw kadagitoy iti masakbayan,” kinuna pay ni Zerrudo.(Mancielito S. Tacadena/NBN Vigan)

 

Comments are closed.