Footer

2 Amerikano, nagprotesta iti sanguanan ti maysa a bangko

CANDON CITY – Dua nga Amerikano ti nagprotesta iti sanguanan ti maysa a bangko ditoy gapu ta mapapati a saanda a mapnek iti serbisio ditoy.

Nagpagnapagna da John Busenbark ken John Bryan iti sanguanan ti Banco de Oro-Candon Branch a nagiggem iti plakard a nakaisuratan dagiti balikas a: BDO is unfair to foreigners!

Ngem kinuna ti maysa nga empleada ti Banco de Oro-Candon Branch idi beneripikar ti Tawid News Magasin no adda pay la nga agprotprotesta ti nasao nga Amerikano a narisuten ti problema.

Sakbayna, iti interbio ti DZTP Radio Tirad Pass kadagiti Amerikano, kinuna dagiti dua a kangrunaan a nagprotestaanda ti saan a nasayaat a customer service nga impaay ti nasao a bangko kadakuada.

“We are protesting their unfair treatment to foreigners… they need to learn a lesson about customer service (Protestaanmi ti saan a nasayaat a panangtratarda kadagiti ganggannaet…  kasapulan nga agsursuroda iti panagserbi kadagiti kustomer,” kinuna ni  Busenbark iti interbio kenkuana.

Mapapati a nagramut ti panagprotesta dagiti dua nga Amerikano idi napan nagiyaon  ni Busenbark iti kuarta iti ATM machine ti BDO. Mapapati a  naikissay ti iyaonna a P10,000.00 iti accountna ngem awan ti rimmuar a kuarta.

“Shame on them!” kinuna ni Busenbark.

Ngem inlawlawag ni branch manager Mary Ann Munar a posible nga idi naikissay ti withdrawal ni Busenbark iti ATM accountna, rummuar koman ti kantidad ngem nairan a nag-off-line ti makina, isu a saanen a nakaruar ti kuarta.

Nupay kasta, kinuna ni Munar a saanda a maited a dagus ti gatad a mapapati nga iyaon koma ni Busenbark agsipud ta adda sursurotenda a proseso.

Imballaag pay ni Busenbark a saanda nga agsardeng nga agprotesta iti sanguanan ti nasao a bangko agingga a saan a maited kenkuana ti kuartana ta kasapulanna unay.

Temporario nga agnanaed ni Busenbark ken ti asawana nga Ilokano iti Barangay Calaoaan  ditoy siudad.

Comments are closed.