Footer

Amasona a nagudas iti enkuentro, nabigbig, naiyawid ti bangkayna

BANGUI, Ilocos Norte – Naiyawiden ti bangkay ti amasona a maysa kadagiti nagudas iti enkuentro iti nagbaetan dagiti tropa ti gobierno ken dagiti kameng ti New People”s Army iti nagbeddengan ti Sta. Lucia ken Salcedo, Ilocos Sur  idi Hulio 27.

Segun ken ni Lt. Col. Roy Devesa, commanding officer ti 50th Infantry Brigade, Philippine Army, binigbig dagiti kakabagian ti bangkay ni Rachel Ravina, 28,  ket inyawiddan iti Barangay Baroyen, ditoy nga ili.

Awan pay ti nangtunton kadagiti dua pay a kameng ti NPA a kadua ni Ravina a napasag iti nasao nga enkuentro.

Mapattapatta a nasursurok ngem tallo dagiti nagudas a kameng ti NPA gapu ta lima dagiti high powered firearms a narekobre dagiti soldado iti nakapasamakan ti ranget.

Awan ti casualty iti biang ti tropa ti turay.

Segun ken ni Col. Leo Quegis, nasurok-kumurang a 20 dagiti kabusor ti turay a nakaengkuentro dagiti soldado.

Kinuna ni Quegis nga impakatda ti naing-inget a panagmonitor gapu kadagiti nagsasaruno a pammapatay iti Sta. Lucia, Ilocos Sur nga itudoda a gapuanan dagiti kabusor ti turay.

Dinakamat ni Quegis ti kaso ti napapatay a retirado a polis ken maysa nga aggatgatang iti botelia a mapapati nga informer a mapapati a gapuanan dagiti NPA.

Kinunana a napatalgedanda ti lugar a yan ti kampo dagiti kabusor ti turay babaen ti Class A nga impormasion manipud iti maysa a dina innaganan a sibilian.

Nakumpiska dagiti soldado iti narubbuotda a kampo dagiti naglibas a kabusor ti turay dagiti subersibo a dokumento, paraphernalia, liblibro ken high powered firearms a pakaibilangan ti tallo nga M-16, maysa a baby armalite ken maysa nga M-14.

Kinuna ni Quegis a natiliw idi iti Sinait, Ilocos Sur  ni Ravina a kameng ti NPA nga agdakdakiwas iti Ilocos Norte ket nakasuan iti korte ngem sinuportaran dagiti grupo a Karapatan ken mangitaktakder iti human rights ket tinakiasanna ti piansana.#

 

Comments are closed.