Footer

Basura kadagiti kalsada iti siudad, narugian a maakup

BAGUIO CITY – Temporario a makaanges iti nalukay dagiti agindeg ta narugian a maakup met laengen dagiti binuntuon a basura kadagiti kalsada ditoy siudad.

Narugian a maakup dagiti basura kadagiti kalsada manipud pay idi Lunes ket maipanda iti temporario a pagbasuraanna iti Capaz, Tarlac. Mapattapatta a makagastos ti siudad iti P315,000 iti inaldaw a pannakaakup dagiti basura.

Aganay a 140 tonelada ti maurnong a basura ditoy siudad iti inaldaw.

Sakbayna, iti sanguanan ti saan a panagkikinnaawatan dagiti agtuturay ditoy, nabuntuon dagiti basura kadagiti kalsada ditoy a siudad gapu iti saanda a pannakakolekta iti napalabas a makalawas.

Pinasardeng ti sangguniang panglungsod ditoy ti Metro Water Management Corp. nga agkarga kadagiti basura gapu iti mapapati a kaawan ti pammalubos manipud iti konseho ditoy siudad.

Sakbayna, nakikontrata ni Baguio City Mayor Reinaldo Bautista, Jr. iti nasao a pribado a kompania nga agakup kadagiti basura tapno maikkat dagitoy a naibuntuon kadagiti kalsada.

Ngem kuna ti konseho a kasapulan a maidatag kadakuada nga immuna ti kontrata agsipud ta nainbolbar ditoy ti pannakailatang dagiti pundo.

Plano ti gobierno ti siudad a maiyalis iti pagibasuraan manipud iti Irisan iti Clark, Pampanga, iti Naguilian, La Union ken iti Capas, Tarlac.

Ngem mapapati nga awan pay ti paglawaganna iti daytoy a plano.

Nagbarikada manen itay napan a lawas dagiti agindeg iti Barangay Irisan, Tuba ken apektado nga agindeg iti siudad ti dumpsite gapu iti saan a naan-anay a pannakaimplementar iti pannakaserra ti nasao a dumpsite.

Immuna a binarikadaan dagiti residente iti Barangay Irisan, Tadiangan, Asin ken Tuba ken apektado nga agnaed iti siudad idi umuna a lawas ti Hulio ti sumrekan dagiti trak iti pagibasuraan iti Irisan kas protestada iti kasla bantay a buntuon dagiti basura iti dumpsite.

Maysa nga agindeg ditoy ti nagkuna a dida kayat ti maipada iti Payatas dumpsite a nargaay a nakatayan iti sumagmamano nga agindeg.

Impeksa met dagiti agnaed kadagiti kaparanget nga ili ti saanda a yaanamong a maiyalis ti pagbasuraan iti lugarda.

Kinuna dagiti opisial ditoy siudad nga iti pannakailatang ti pondo para iti pannakaakup dagiti basura, kasapulan a magna iti bidding.

Saan met nga inanamongan ti konseho ti plano ti ehekutibo a mangala iti pondo para iti pannakaakup dagiti basura iti calamity fund.

Imbasura ti sangguniang panlungsod ditoy ti singasing a mangikabil iti siudad iti babaen ti state of calamity.

No koma maideklara ti siudad iti babaen ti state of calamity, iti calamity fund ti pangalaanna iti busbosenna para iti panagakup ti pribado a kompania kadagiti basura.

Sabali pay a kitkitaen ti konseho ti siudad a mabalin a pagibasuraan ti daga a kukua dagiti ag-Carantes a masarakan iti Virac, Itogon, Benguet.

Mapapati nga ilaklako ti nasao a pamilia ti daga nga aglawa iti 10 ektaria.#

 

Comments are closed.