Footer

EDITORIAL: Biddut kadagiti libro, kasapulan ti panangatur

Binabalaw ni dati a gobernador ken diputado ti Ifugao Gualberto B.
Lumauig ti Department of Education gapu iti panangaprobarna a maaramat
iti pagadalan publiko ken pribado iti elementaria dagiti libro a
naglaon kadagiti saan a pudno nga impormasion mainaig kadagiti agnaed
iti probinsiana.

Dinakamat ni Lumauig dagiti libro nga “Ang Lahing Pilipino sa Nagbabagong Panahon” a libro para iti Grade 6 ken ti “Ang Lahing Pilipino” a para iti Grade 2.

Segun ken ni Lumauig, iti panid 40 ti “Ang Lahing Pilipino sa Nagbabagong Panahon”, nadakamat nga agnanaed dagiti Ifugao iti probinsia ti Benguet idinto nga iti panid 41, nailadawan dagiti Ifugao nga “agputputed iti ulo, narungsot ken mannagibales”.

Kinunana a masarakan met iti panid 5 ti “Ang Lahing Pilipino” nga “am-ammo dagiti Ifugao a narungsot, kabutbuteng dagiti Kristiano, awan ti bigbigenda a Dios ket masarakan met ti Banaue Rice Terraces iti Benguet”.

Iti met laeng nasao a libro dagiti Grade 2, nailadawan iti sibubukel a panid ti Ifugao Rice Terraces idinto a napauluan ti estoria iti panid 40 iti “Ang Alamat Ng Mina Sa Baguio”.

Masapul nga akkalen ti Department of Education dagitoy a libro agsipud ta padaksen ken ibabada dagiti Ifugao, impetteng ni Lumauig.

Adda kalintegan ni Lumauig a mangbasnot iti DepEd gapu iti panagliwayna a mangkita kadagiti laonen dagiti libro nga aramaten dagiti agbasbasa iti klaseda agsipud ta palso ti impormasion nga itdenna kadagiti ubbing nga agbasbasa ket gapu iti daytoy saan nga umisu nga impormasion, agtungpal iti nababa a panagkita dagiti makabasa kadagiti Ifugao, agbalinda a pagbutbutngan, mauy-uyaw ken kasapulan nga adaywan dagiti kristiano ken dadduma pay nga agindeg ditoy pagilian.

Iti panawen ti panagbasana iti elementaria ti kasayaatan a tawen a panangmuli iti maysa nga ubing. Aniaman a maadalna iti daytoy a panawen, agbalindanto a naamnut a linas a mangiturong ken mangkibin kenkuana iti daliasatenna a dalan iti masakbayan. Aniaman a mabasana iti daytoy a panawen, kayariganna ti kanbas a narigat a mapunas iti isipna nga aramatenna a mangibisik iti bukodna a kapanunotan, pagtakderan ken pagbatayan.

Maipalagip la ket ngarud kadakami ti krusada ti maysa a propesor a mangpukaw kadagiti adu a biddut ken di umisu nga impormasion a linaon dagiti sabsabali pay a libro nga ar-aramaten dagiti agbasbasa iti elementaria ken sekundaria.

Agingga ita, iyik-ikkis pay la ti nasao a propesor dagiti nasukalanna a biddut kadagiti sumagmamano a libro nga iwarwaras ti DepEd para kadagiti agbasbasa nga ubbing agsipud ta saan a maako dagiti agtuturay daytoy nga ahensia nga adda panagliway dagiti nakaipablakayan iti pagrebbengan a mangkita ken mangsukimat kadagiti libro a maar-aramat kadagiti pagadalan tapno maatur dagiti biddutda tapno saan a masabidongan dagiti ubbing iti saan nga umisu nga impormasion ken pannursuro.#

 

Comments are closed.