Footer

SALAYSAY: ITI INDAYON NI LAGIP: Sulisog (Gibusna)

Gapu ta awan ti mangistimar kadagiti annakmi, napanunot ni Elma nga iyuman iti DSWD iti ilimi a Tagudin.  Pinaawagandak ti DSWD tapno mapagsasaritaanmi maipanggep dagiti ubbing.  Kapilitan a nagawidak ditoy probinsia.

Idi addakamin iti sango dagiti social worker ti DSWD, impeksak ti riknak nga agsinakami laengen ken ni lakay. Adda naaramid a kasuratan a nagpinnirmaanmi nga agassawa.  Kayatko nga ipaampon  dagiti annakmi kadagiti mayat a kaarubami ken kakabagianmi ngem iti dayta a desisionko, nagkedked ti asawak.  Saanko a naipapilit ti kayatko.

Saannakon a naggian iti balaymi. Naggianak iti balay dagiti nagannak kaniak idiay Bangar, La Union.

Iti panagsublik iti sidong dagiti nagannak kaniak, imbaga ti amak nga adda am-ammona a baro a lakay a makakursonada kaniak.  Kinunana a baknang daytoy ket sigurado a nasayaatto ti panagbiagko no kayatko. 

Iti maysa a rabii,  nagpasiar ti lakay a baro iti balaymi. Madlawko ti napigket a perrengna kaniak. 

“No kayatmo, agkasarta iti mabiit,” kinunana pay.

“Kas pagarigan, umanamongak, palubosam kadi dagiti annakko a makikabbalay kadata?” pinangsintirko iti nakemna uray awan a pulos ti sumgar a dutdotko kenkuana. 

“Diak kayat ti agtaraken iti saanko nga anak,” kinunana ketdin.

“Ladingitek ngarud nga ibaga a kumitaka laengen iti sabali,” nakunak.

“Ikkanka iti naan-anay a panawen nga agpanunot,” kinunana.

Nalagipko la ket ngarud ti asawak.  Simken ti asik kenkuana.  Siak ti ayan ti biddut.  Saan koma a kasta ti napasamakmi nga agassawa no diak nakaaramid iti biddut iti biagmi.

Tapno aggibusen ti panangrengreng kaniak ti lakay a baro, nagpakniak iti balay da Elma a gayyemko. 

“Dimo pay la inawat ta dikan agrigat,” insugsog ni Elma kaniak. 

Bayat nga agsarsaritakami ken ni Elma, dimi napupuotan a simrek ni Rey.  Nakapustora ken nadalimanek ti panagkawkawesna.  Imetna pay la ti puner a namagtinnag kenkuana. Diak ammo, ngem naisangsangayan ti pitik  ti pusok. Baro a rikna, baro a panunot ken panangipateg. 

“Aggawidkan idiay balay. Masapuldaka dagiti ubbing,” kinunana.

Diak nakasungbat. Minatmatak iti nabayag. Kasla diak patien ti nangegko.

“A, e, panawankayo pay ket adda gayam trabahok dita baba,” nakuna ni Elma. Saannan nga inuray ti sungbatmi ket rimmuar iti balay.

“Akuek, nasugat unay ti riknak gapu iti inaramidmo,” kinuna ni Rey. “Ngem saanko a mailibak kadagiti annakmo a sika ti inada.”

“Maawatdak ngata pay dagiti ubbing?” sinaludsodko.

Nagtung-ed. “Mailiwdan kenka. Isu nga aggawidkan. Mabalintayo ti mangabaruanan, saan?”

Nariknak ti dakulapna a naiparabaw iti imak. Minatmatak manen. Agpakpakaasi dagiti matana, ket nasirayak manen kenkuana ti panangilala ken pammateg kaniak.

Diakon nakateppel, Manong Danny. Nagtinnag ti luak iti panangarakupko kenkuana.

Wen, baliwanmi a bangonen ti pagtaenganmi. Ket ammok, kalpasan dagiti lidem a simmangbay iti biagmi,  napigpigsaka, natibtibker ken nataltalgedkami itan a sumango iti pannubok iti masakbayan.

Ditoyen ti pangigibusak iti pakasaritaan ti biag ken ayatko, Manong Danny.  Sapay  koma ta nakaibatiak iti ulidan ken sursuro iti daytoy a salaysayko.  

     

Toy gayyemmo a nagsurat

Lea iti Tagudin, Ilocos Sur.

 

Comments are closed.