Footer

SARITA: Gudboyen ni Eugene

Nakababan dagiti manok manipud iti aponda a duogan a salamagi. Sarsarigsiganen dagiti kawitan dagiti upa idinto nga agkarkaraykay ti maysa a tagibian nga addaan iti pito a piek. Agnginnginnernger met iti ayan ti ridaw ti kalapaw ti nakuttong ken gudgod nga aso ken agmaya a pusa. Iti daya, sumirsiripen manipud iti Bantay Marplogo ti umuna a raya ti init agsapa.

Iti ballasiw ti kalsada, kumaribuson dagiti balsamador ti Sleep Forever Funeral Parlor a kutingting a kutingting kadagiti karagkarag a karro. Maysa kadagitoy ti karuprupa ti cartoon character a ni Soneyo ti Doreimon a nangipullat iti buliom ti radio ket kunam pay, agal-allangogan ti maipatpatayab a  makaduayya a samiweng nga “Ave Maria” manipud iti trumpa.

Iti iddana, nupay agdudungsa pay laeng ni Eugene gapu ta napan nakiinninum idi rabii, kasla napat-ilan a nuang idi maitubong iti lapayagna ti ayug nga aggapu iti ballasiw ti kalsada. Nagbukibukirad  dagiti dadakkel nga abut ti agongna sa bumanang-es a bimmangon manipud iti masmaspig ken binalayanen ti kiteb a kamana. Inalikumkomna lattan ti tungtungawen nga ulesna sana imparabaw iti puro tarumatim ken nabang-in a punganna.
Sakbay a rimmuar, sinirigna iti tipping a sarming ti rupana a napno iti abut ti kamuro. Nagdudukotanna a pinis-it dagitoy idi isina ni Roselily, ti immuna a nobiana idi iti high school. Nagbabawi ngem naglikkaongen ti rupana.
Kasla elepante ti kadagsen dagiti addangna a limmasat iti kadaklan ket uray la naggunggon ti datar ti kalapawda. Nadlaw dayta ni Baket Delilah nga inana a madama nga agdubdubla iti pinadisna.
“Ne! apayen, Eugene. Rebbaem met ‘toy kalapawen,” imbannikes pay daytoy ti nangsirig iti anakna.
“’Nak ti sal-ot dagita a balsamador! Bigbigatenda ket ti agpatpatokaren iti kanta ti pumpon,” uray la nagsapri ti ngiwatna.
“Pakabibiangam koma aya? Dayta ket bagim ti intonaram. Nasayaat ketdi ta pinabangondaka, laglag,” inwitwit ni Baket Delilah.
“Ho! Kasda la kalalaingan. Kakaisuna nga awan ti trabaho ita. Pay man ta uborek ida,” ket sakbay a naigawid ti baket, nagammatannan ti kasla gemgem a banag iti sikiganna ngem uray la a napakiet ta nalukneng daytoy. Rugit gayam ni Bin Laden, tay asona a gudgod!
Ad-addan ti pungtotna a nagdiretso iti bubon. Manen, gapu ta dina kitkitaen ti dalanna, nabaddekanna tay Mr. Clean with calamansi scent a sabon ti inana ket naibalat a kasla pilat iti kabatuan a pagkulkuladaan.
“Annay!” inriawna ti sakit a nariknana.
“Ania ti kukuem aya!” tumanabutob ni Baket Delilah a napan nangatibay iti unico hijona a simrek iti kalapaw.
Eugene Garcia Jr. ti sibubukel a naganna. Isu ti kakaisuna a bunga ti innarasaas da Baket Delilah ken daydi Dios ti aluadna a Eugene Sr., Hawayano a taga-Dammay, Santa a naisar-ong iti Ballesteros, Cagayan idi tartaraudi ti dekada 60s bayat ti panagsapulna iti asawaenna iti maikadua a gundaway.
No apay nga agnaedda nga agina ita iti kalapaw gapu dayta iti panangibabawi dagiti annak ti Hawayano iti umuna nga asawana kadagiti amin a sanikua daytoy kalpasan a naatake bayat ti romansada iti kalaplapsatanna idi a ni Delilah. Adu ti agkuna a nagtomar iti Viagra isu a naatake a dina oras.
 Agtawenen ni Eugene Jr. iti tallopulo ket walo ngem awan pay ti kaulesna. Kasla naawanen ti essemna nga agarem kalpasan nga insina ni Roselily. Nagbasa met idi iti Memong de la Hayblad College of Engineering. Addan iti maikatlo a tawen ti kursona a kinainhiniero sibil idi insungsong ti kakaisuna a gayyemna a ni Godofredo Palacay Jr. a mapan agestambay iti Emiliana Videoke Bar a nakaigapu iti didan panagturpos iti kolehio.
Sabagay, mainaig met laeng iti kursoda ti trabahoda ita. Peon iti konstruksion ni Eugene idinto a certified a kobrador ti hueteng ni Godo.
Mayat man ngamin ti panagdengngegna iti birngasda kenkuana a Videoke King ta uray kasla nabartek a tukak ti bosesna, kababaan ti 98 a gradona gapu iti pigsa ti riawna iti mikropono. Paboritona a kantaen tay “Tukso, Layuan Mo Ako” nga iranrantana nga ipangngeg ken ni Emiliana, ti balkat a makinkukua iti bar a patay na patay kenkuana.
      (Adda tuloyna)