Footer

TARAON TI PANUNOT: Sarakem nga umuna ti kappia iti pusom

Napasangbay ni Apong Illo ni Berto iti dayta a malem, a kasla nauneg unay ti pampanunotenna. Nakatugaw iti pasangol ti pangga, madama ti panagbamban ni Apong Illo iti paggalutna iti sigpit ti burrarawit nga alad ti solarda. Napanunotna a kubongen ti solarda iti burrarawit ta pagibulosanna iti kaldingna. Napariir ti sirok ti kamantiris a pagibabaudan ti lakay iti saraan a nuangna.

“Marunaw kadin ti lubong, apong?” dinamag ti baro.

Nagrupanget ti lakay ta iti pannakakellaatna iti nangngegna a saludsod,  dandanina pay nasugat ti kanigid a tammudona gapu iti panagliggasi ti panaggislana iti bayog a bambanenna.

“Ania a marunaw ti sasawem aya, nga  ubing?”

“Isu met ti ipukpukkaw dagiti dua a lalaki iti tiendaan, apong. Napanak ngamin nakitienda isu a binuyak ida.”

Nanglangit ti lakay. Makulit ken managdamag ni Berto kenkuana sipud pay idi ubing. Nasaep ti lakay a saan la ketdi nga inggaan ti barito.

“Iti uray ania a kanito no pagayatan ti Apo, awan ti makalapped,” kinuna ti lakay.

“Kasano ngarud a maisalakantayo, apong?”

“Inka probokaren dagiti matmaturog iti kamposanto.”

“Dagiti natay, apong?”

“Wen a…probokarem ida, sakanto agsubli…inkan…”

Nagtungpal ti barito. Ta dakkel ti pammatina iti lakay sipud idi ubing. Dakkel ti  impluensia kenkuana ti lakay. Patienna amin nga ibaga ti lakay.

Napan ngarud ti barito iti kamposanto iti amiananenda, dua a kakelleng ti kaadayona manipud iti sirok ti kamantiris a pagbambanbanan ni Apong Illo.

Linaawlaawan, binatobato, pinalapal, binassawangan ni Berto dagiti panteon. Arigna kayatna a rebbaaen pay dagitoy. Sa nagsubli iti lakay.

“Ania ti kuna kenka dagiti natay?”

“Awan met, apong!

“Agsublika  manen.”

“Ania? Ania ngarud ti aramidek?”

“Inka met ita idaydayaw ida. Inkan ta hustonto a malpasko ‘toy panagbambanko. Innakton mangruot no kua…”

Nagtungpal ti barito. Indaydayawna dagiti natay. Arigna agkanna aminen a panteon iti kamposanto. Sa nagsubli iti yan ni Apong Illo.

“Ania ti kuna dagiti natay?”

“Awan met, apong!”

“Uray no nalabes ti pananginsultom kadakuada wenno nalaus la unay ti panangidayaw ken panagrukbabmo kadakuada, saandan nga agsao. Saandan nga agreklamo. Ta  saan nga agtaud manipud iti pananginsulto wenno  nalabes a panagdayaw iti pada a tao ti pannakaisalakan no di iti nainkappiaan a panagbiag ti tao. Ta saan kadi nga adda kappia iti uneg ti kamposanto? Naulimek sadiay, saan?”

Napanganga ni Berto iti nangngegna.

“No kayatmo ti maisalakan, sarakem pay nga umuna ti kappia iti pusom.”

ADDA dagiti gundaway a pannakaburibor ti tao. Ngem imbes koma a maburibor iti panagpampanunotna, apay a dina saraken ti kappia? No nalidayka, sarakem ti ragsak, kas met a no mabisinka, sarakem ti taraon ken manganka. Apay a pakariribukam dagiti awan kaes-eskanna a banag idinto nga adda dagiti napatpateg ngem kadagitoy? Daytoy ti kaipapanan iti nadakamat a sarsarita.#

 

Comments are closed.