Footer

P243-M pategna a droga, nasamsam iti operasion ti kapolisan iti umuna nga innem a bulan: PPO

VIGAN CITY – Aganay a P243 million ti pateg dagiti droga a nasamsam ti polis ditoy probinsia iti umuna nga innem a bulan daytoy a tawen.

Iti report nga indatagna iti miting ti provincial peace and order council a naangay iti provincial capitol itay nabiit, kinuna ti PPO a nakasamsamda iti 3.22 gramo ti shabu; 14.5 gramo a marijuana leaves; 1,052,000 a pinuon ti marijuana; 63,000 a marijuana seedlings ken 3 kilo a marijuana seeds a mapattapatta nga agdagup amin iti P242,967,000.

Karaman a timmabuno iti nasao a miting da Col. Pompeyo Limbo ti 503rd Infantry Brigade, Lt. Col. Roy Devesa, Provincial Director Police Senior Supt. Virgilio Fabros, DILG Provincial Director Godofredo Martinez, sumagmamano a mayor nga indauluan ni Mayor ti Narvacan Edgar Zaragoza, pannakabagi ti provincial social welfare office ken dagiti nadumaduma a non-government organizations.

Innayon ti PPO nga iti umuna nga innem a bulan daytoy a tawen, nakaiwayatdan iti 27 nga operasion kontra iti illegal a droga a nakatiliwan ti 27 a tattao a mapapati nga adda pakainaiganna iti daytoy maiparparit nga agas.

Ngem kinuna ni Fabros a dismayado gapu ta kaaduan kadagiti naaresto a suspetsa ket nakapagpiansada wenno nadismis ti kasoda iti laksid dagiti naiparangda nga ebidensia.

“Maysaak met nga abogado ngem diak ammo ta sabsabali ti tulong dagiti adda iti piskalia ken hues,” insentimiento ni Fabros.

Kabayatanna, nailanad iti dayta met laeng a report nga adda duapulo ket walo a barbarangay iti intero nga Ilocos Sur nga apektado wenno pagrarairaan ti operasion ti droga idinto nga adda met tallo a less seriously affected ken duapulo ket lima a barangay a makuna a threatened.

Nupay kasta, saan nga innaganan ti PPO dagiti barangay nga apektado iti illegal a droga.

Indawat ni League of Municipalities of the Philippines, Ilocos Sur Chapter president Edgar Zaragoza nga inaganan ti PNP dagiti barangay a pagrarairaan ti illegal a droga tapno makatulong dagiti mayor iti pannakasolbar daytoy a parikut.#

Comments are closed.