Footer

SALAYSAY: Broccoli, lapdanna ti prostate cancer

Iti maminsan laeng iti makalawas nga inka panagsida iti broccoli, lapdannan ti prostate cancer, daytoy man ti natakuatan ni Richard Mithen, biologist iti Britain 's Institute of Food Research kas inreport Reuters itay  nabiit.

Maysa ngarud a naimbag a damag ken takuat daytoy.

Ta iti panagsukisok ni Mithen, 680,000 ti agsakit iti prostate cancer iti sibubukel a lubong ket 220,000 ti maungkel wenno di  makalasat.

Sumegsegundo ti prostate cancer iti lung cancer a kangrunaan a  mangongkel kadagiti lallaki iti lubong.

Adda agsida iti broccoli, adda kano  naisangsangayan a ramenna  a mangdepdep iti panagramaram ti carcinogen iti bagi. Tapno mapukaw daytoy a carcinogen iti bagi, nasken ngarud ti panagsida iti broccoli uray iti maminsan laeng wenno ad-adu pay iti uneg ti makalawas.

Ta ania ngamin aya ti carcinogens a makunkuna? Maysa a substance, radionuclide wenno radiation agent a mamagtignay iti pannakaadda iti cancer no di man mangaktibo iti addan a nagtubo. Kangrunaan kadagitoy a carcinogens ti pannakayekspos kadagiti asbestos, dioxins ken aglalo unayen iti panagsigarilio. Iramanen dagiti asuk a malang-ab kadagiti asimbuyok dagiti lugan wenno iti nakaro a panangipauneg iti carbon dioxide.

Ta ania ngamin aya ti adda iti broccoli nga awan kadagiti sabsabali a nateng? Addaan kano ti broccoli iti compound a maawagan iti sulforaphane. Kuna  ni Mithen a daytoy a compound ti mangkugtar ken mangpukaw kadagita carcinogen iti bagi. Nupay adu a nateng ti pakaalaan iti sulforaphane, kangatuan a pakalaanna iti broccoli.

Makaala met ti sulforaphane iti cauliflower, repolio, tunsoy wenno water cress  ken marunggay. Adayo ngarud ti cancer no adda latta dagitoy nainaganan a natnateng iti resipem wenno luto a maipuni.

 Kasla kano addaan iti switch ti bagi, kuna man ni Mithen. Iti kanito nga adda carcinogens iti bagi, ilukat daytoy a carcinogens ti panagkanser. Ngem iddepen wenno pukawen ti sulforaphane daytoy a carcinogens.

Kastoy met laeng ti naireport iti Journal of Allergy and Clinical Immunology a panagsukisok ti University of California, Los Angeles. Naduktalan iti panagsukisok a ti sulforaphane a maala iti broccoli, inna gangtan ti panagaktibo dagiti antioxidant ken enzyme a manggubat iti rason ken gapu ti panagkanser.

Daytoy met a takuat ti rason dagiti food supplement producers tapno agaramidda kadagiti naikapsula a broccoli extract a nanglayus iti merkado iti agdama. Wen, magatangen iti merkado ti broccoli extract. #

Comments are closed.