Footer

SALAYSAY: ITI INDAYON NI LAGIP: Ti Kateksmeytko (Umuna a paset)

Dear Manong Danny

Iti patinayon a panagdengdengngegko iti makaay-ayo a programam, naawis man daytoy riknak a mangisurat iti diakto pulos kalipatan a pakasaritaan ti biag ken ayatko.

Ilingednak iti nagan a Yana, balasang a taga-Pangasinan. Iti tawenko a 23, naaddaannak iti iti teksmeyt a dandani nakaisagmakak!

Manong Danny, diak malipatan dayta nga aldaw, kaaldawan ti pannakaangay ti eleksion nasional idi 2004.

Napanak bimmutos iti dayta nga aldaw.  Kalpasanna, nagawidak met laeng idiay balay ket nagdengngegak iti radio station iti Baguio City. 

Nairana nga iyaw-awag ti radio announcer ti numero ti selpon ti maysa a baro nga agtarigagay a makiteksmeyt iti maysa a balasang.  Insuratko ti numero ket indialko a dagus.  Kalpasan ti sumagmamano a segundo, nagkiriring ti selponko. 

Kastoy ti naisurat: “Hi, ano ba ang nem mo?”

“Ako c Yana, 23 yers old,”  dagus nga intextko.

 “Taga-saan ka, Yana?” sinaludsodna.

“D2 sa Pangasinan, ikaw?”

“Taga-La Union ako,” insungbatna.

Dayta ti rugi ti panagam-ammomi ken ni Bernard,  Manong Danny.  Iti panaglabas ti aldaw, nagtultuloy ti panagsinnukat dagiti mensahemi a dua.  Kalpasan ti dua a domingo, nagdaton kaniak ni Bernard. 

“Yana, di ko na mapigilan ang itinitibok ng aking puso.  I love you!  Mahal na mahal kita.”

Dagita man dagiti nasam-it a balikasna kaniak, Manong Danny. 

Wen, simmangbay ni Bernard iti panawen a diak pay nakabangon iti sugat nga impalay ni ayat. 

Babaen dagiti agkakasam-it a balikas ni Bernard, nalipatak a naminpinsan ti naliday a kalmanko. Nagbalin a maris-rosas ti baro a lubongko.  Simmingising ti baro nga agsapa iti biagko.  Nagrusing manen ti baro a santak iti dandanin manglaylay a pusok. 

Idi Hunio 2, 2004, napanko binisita dagiti kakabagiak idiay Manaoag ken panggapuak metten a makimisa iti simbaan ti Our Lady of Manaoag.  Nagtulagkami ken ni Bernard nga agkitakami iti dayta nga aldaw. 

Alas 9:30 iti bigat idi dimmanonak iti Dagupan.  Inteksko kenkuana a kitaennak iti terminal ti minibus nga aggapu idiay San Fernando, La Union.  Imbagak nga aginnuraykami, asinoman ti umuna a makadanon sadiay.

Siak ti immuna a simmangpet iti terminal.  Nagtugawak iti waiting area ti terminal a nanguray ken ni Bernard.

Arig di pay napudotan ti tugawko, nagteks kaniak ni Bernard nga asidegen. Dinamagna no ania ti kolor ti inaruatko. Inteksko a kolor orange ti blusak.

Adda lalaki a labas a labas iti sanguanak ngem di met immasideg.

Idi awan a maurayko ni Bernard, inteksko: “Kung ayaw mong makipagkita sa akin, sabihin mo na para hindi ako nagmumukhang tanga sa paghihintay sa ’yo.  Kung di ka pa magpakita pagkalipas ng dalawang minuto, aalis na lang ako.” 

Kalpasan ti sumagmamano a darikmat, nagsardeng iti sangok ti  maysa a lalaki a nakaaruat iti puraw a t-shirt, agtayag iti lima kadapan ken pito a pulgada.

“Ikaw ba c Yana?”  sinaludsodna, Manong Danny.

“Oo, ikaw si Bernard?”

“Oo, inta ngaruden idiay Manaoag,”  inyawisna kaniak.

Bayat ti panagdaliasat ti luganmi, naginistoriakam, Manong Danny.  Awan ti ania a naammuak maipapan ken ni Bernard. Ngem ketdi, madlawko a matnagen ti riknak kenkuana.

Idi makadanonkami iti Manaoag, inyawisko a mapankami iti paglakuan ti footwear ti ikitko. Inyam-ammok ni Bernard a kas maysa a gayyem.  Ngem di pulos simmungbat ni Bernard idi pagunian ni anti, banag a nangmissuotan ni anti kaniak.

Dagus nga impakadak a mapankami sumuknal iti simbaan. Nangitugkelkami iti saggaysakami a kandela iti laem ti simbaan sakam napan nagkararag iti sanguanan ti birhen ti Manaoag.  Kalpasanna, nagtugawkami iti pagtugawan iti ruar ket ditoykami a nagtungtong. 

Nagsasaruno ti teks ti ikitko a mapankami kano idiay ayanna ta kayatnak a kasarita.  Kapilitan a nagsublikami iti paglakuan ti ikitko.  Saan a nakisango ni Bernard iti ikitko,  banag a saan manen a nagustuan ti ikitko. 

Pinagmeriendanakami ni anti.  Kalpasanna, imbagana nga  agawidakon idiay balay.

       (Adda tuloyna)

Comments are closed.