Footer

SARITA: Gudboyen ni Eugene (Maikadua a paset)

Apagsipnget pay laeng mayaten ti sagawisiw ni Eugene iti sango ti sarming ti antigo nga aparador. Inawis ngamin dagiti kameng ti SK a mapan makisala iti box social nga angayen dagiti agtutubo. Inasitganna ni Baket Delilah idi agangay.

“Nang ikkannak man ti kuartayo,” inyumbina ken ni Inangna.

“Ta pagan-anom?” makaipas a kusilap ti imbales ti baket a nangsirig iti langa ni Eugene a kunam la no modelo ti gel iti patugargar ken arigna maritangtang a buokna a nabarabadan pay iti nalabaga a panio.

“’Pan man met datao sumala. Agpasala kan ita ti kandidatatayo ditoy Purok Carawa,” inyad-addana ti nanglailo iti inana a masiluan pay laeng ti subsobna.

Arintukiaden ti baket a nangiyawat ti naduggiot nga ube manipud iti petakana nga insagut pay la daydi Dios ti aluadna nga asawana idi agar-arem pay daytoy. Inagawaan ni Eugene a siniggawat ti kuarta ket uray la mangigis ti isemna a nanglagto iti lima a pangal ti agdan ti kalapawda.

Kalkalpas ti pannakailako ti umuna a box ti kandidata idi dumteng ni Eugene iti salaan.

“Mabayadan daytoy a piesa iti lima a pisos,” inwaragawag ni Konsehal Pakol iti mikropono.

Kasla nabisinan nga aso ni Turcuato a napan nangallop iti isalana. Pinilina tay taga kabangibang a barangay.

“May I hib dis dans mis biutipul,” inkiddayna iti balasang.

Namagusto met daytoy uray medmedmedanna ti isemna iti langa ti mangisala kenkuana. Kinepkepan a dagus ni Eugene ti kasalana. Nagmayat man ti panangdanggayda iti swit music a salsalaenda. Ngem saan pay a napudotan ni Eugene ti nagsala, nakulkol ti teyp ket kapilitan a ti bak-ap a CD player ti inusar ti adda iti master control. Ti makadakes  saanen a swit ti naipisokna no di ket tay papaya dance. Nabigla ni Eugene ta dina ammo daytoy a salaen. Napatunganga a mangbuybuya lattan iti kaparehana a mayaten ti kulagtitna. Nadlaw dayta ti balasang ket masemsem nga aglayon koman iti tugawna ngem inggawid ni Eugene a naalanan ti riknana a sumala. Ti met kaparehana ti nakigtot ta kasta unayen ti kulipagpagna a kasla agsakit iti kissiw. Arigna iyiddana payen iti salonan idinto a nagmayat ti  panagwidwidawidna. Nagpaigid la ket ngarud dagiti dadduma a pareha ket ni Eugene laengen ti nakaipaayan iti sentro ti atension.

Saan a napupuotan ni Eugene a pinanawanen ti kaasmangna. Ginundawayan dayta ni Emiliana nga adda met gayam nga agbuybuya. Nagkulkulagtit daytoy a kas ken ni Eugene, banag nga ad-adda pay a nakaray-awan dagiti agbuybuya.

“Tira, Eugene,” indirdir-ida.

Isu pay la ti pannakariing ni Eugene manipud iti yuyeng ni tagtagainep. Ni Emiliana a nakasamsam-it ti isemna ti immuna a nakitana apaman nga immulagatna dagiti bugagaw a matana. Nakarikna ti pannakapabain idi ipalawlawna ti panagkitana ta nagadu gayam ti mangbuybuya kadakuada. Inkanayonnan ti nagpaigid sa nagturong iti nasipnget a paset ti salonan a dinan binayadan ti salana iti lamisaan. Sinurot ti katawa dagiti naitallaong.

Saanen a nakisala ni Eugene. Nakiummong kadagiti agiinom iti likudan ti entablado ket ditanan agingga a dinan mabagkat ti ulona.

Bigat. Napigsa ti bayakabak. Agsisinnublat nga umablat ti gurruod ken kimat. Napabaringkuas ni Eugene a nakailad iti papag a nagiinumanda iti napalabas a rabii.

“Diaske, ditoyak gayam a nakaturog,” intanabutobna. Bimmangon tapno aglayonen nga agawid. Naslepen iti tudo.

Rinugianna ti tumaray. Nalabsanna ti naganak nga aso da Kapitan Antokoy ket idi nagngernger daytoy sa kimmamat, ania pay, kasla napakigtotan a banias ni Eugene a nagbuatit nga immadayo.

Idi dandanin makamatan ti aso, kas bakes ni Eugene a nga immuli iti puon ti mangga iti igid ti kalsada. Pimmanaw met laeng ti aso idi nauma a mangtataul kenkuana.

Bumaba koman ni Eugene idi mataldiapanna ti anak a balasang ni Lakay Berto a sumrek iti banioda a naaramid iti napagsasaip a langgusti.

Nagsanapsap ni Eugene idinto a sinimpana ti kimmawiwit iti sanga. Uray la nagbullad dagiti matana idi naguyos ti balasang sana rinugian ti agbuyat.

“Ama, puonayen a pammagi!” nagkuti ti subsob ti ti subsob ti baro.

 (Maituloyto)

Comments are closed.