Footer

Tuloy-tuloyen ti pannakabuangay ti Metro Vigan Coordinating Council: bise mayor

VIGAN CITY – Tuloytuloyen ti pannakabuangay ti Metro Vigan Coordinating Council kalpasan ti panangawaten ti maikapito nga ili iti inbitasion ti siudad ditoy a makipaset iti nasao a konseho.

Segun ken ni Vice Mayor Franz Ranches, inyawaten dagiti innem nga ili  a pakairamanan ti Bantay, Caoayan, San Vicente, Sta. Catalina, Santa, ken Sto. Domingo ti resolution of acceptance  a makipaset iti  mabuangay a Metro Vigan Coordinating Council nga ilunglungalong ti gobierno ti siudad ditoy.

Kinuna ni Ranches nga “in principle” mayat ti San Ildefonso a makipaset iti MVCC ket iti kabigatanna, iyawatdan ti resolution of acceptance.

“Tuloy-tuloyen ti pannakabuangay daytoy Metro Vigan Coordinating Council,” kinuna ni Ranches.

Impakaammo ti bise mayor a maiskediul  ti tallo nga aldaw nga strategic planning workshop a pakipartisiparan dagiti 8 a mayor, 8 a bise mayor ken saggapat a konsehal tunggal ili babaen ti panangesponsor ti gobierno ti siudad para iti pormulasion ti memorandum of agreement ti Metro Vigan Coordinating Council. 

Iti immun-una nga interbiona iti media, kinuna ni Mayor Eva Marie S. Medina a maibinsabinsa bayat ti strategic planning workshop no ania dagiti areas of cooperation a maaramid iti nagbabaetan dagiti munmunisipio ken ti siudad ti Vigan ken no ania ti laonen ti memorandum of agreement a maaramid ket daytoy ti pagibasaran a panangidawatda ken ni Cong. Ronald Singson ti panangidatagna iti maysa a gakat iti Kongreso a mamagbalin ti MVCC a maysa a linteg tapno maikkan daytoy iti legal a personalidad.

“Nalaklakanto ti implementasion iti aniaman a cooperative activities, projects  or programs no adda met la linteg a mangbayabay kadakami am-amin a makimiembro,” kinuna ni Medina.

Kinuna ni Ranches nga iti pannakabukel ti coordinating  council, ad-adda pay a mapabileg ti relasion dagiti nadumaduma nga ili a sakupen ti Metro Vigan ken ad-adda pay a  mapatibkerda a makikumpetision iti globalisasion.

Innayonna a saan a mabalin a bukod laeng ti Vigan City ti agdur-as ngem ketdi kasapulan nga agsisinnukat met iti kapanunotan dagiti konsehal ket mabalin nga adaptaren ti maysa nga ili dagiti proyekto ken programa ti lokal a gobierno.

Kanaig daytoy, impakaammo ti bise mayor a maigiddan ti panagpipinnirma dagiti local chief executives ti 7 nga ili ken daytoy a siudad iti MOA inton Septiembre 8, bayat ti  selebrasion ti maika-250 a tawen ti Nueva Segovia ken ti siudad ti Vigan.#