Footer

Dagiti kagasatan amin kadagiti ikan (Tuloyna)

Ngem saan latta a naikkat ti kinapangas ken kinalastog dagiti kabaddungalanda uray no natiliwdan. Naggagamporda amin.

“Ne, apay nga adda dagitoy kuttongit ken mamirmiraut ditoy?” kinunada.

“Saan a rumbeng a kinalapdakayo nga agkabsat amangan no masabidongan ti boksit ti ari!”

“Adda tetanus dagiti pigarda, kunam a!” binagi ti maysa.  

“Wen, saan a rumbeng a nakalapda. Datayo laeng ti maikari nga agpaay iti ari ta dadakkel dagiti bagbagitayo ken natatabatayo,” binagi met ti maysa nga ikan.

Adu ti nangsittok kada Pembo ken Sendo. Sumagmamano pay ti nangsaplit kadakuada babaen ti ipusda. Adda pay nangsikil kadakuada babaen kadagiti nagdadakkel a pigarda.

Ngem nagpasensia lattan da Pembo ken Sendo. Ammoda nga awan ti maaramidanda no di agibtur. Ammoda nga awan ti kalabanlabanda kadagitoy  pangas nga ikan. Ammoda met  a sumagmamano laengen nga oras wenno maysa laengen nga aldaw ti abutenda ket awatendan ti maudi a kanitoda iti lubong.

“Pilien dagiti nababanal ta agpaay iti ari! Ilasin dagiti kullapit ti bagina ta  bagitayo  a nagkalap!” nangngeg dagiti ikan ti bilin ti kapitan ti barko a nakakalap kadakuada.

Pinili dagiti mangngalap dagiti ikan. Nailasin  nga agpaay iti ari amin dagiti mangsutsutil kada Pembo ken Sendo idinto a nailasinda nga agkabsat para iti maysa kadagiti mangngalap.

Ngem saan a nagpatingga ditoy ti pannakalais da Pembo ken Sendo.

“Hoy, Pembo ken Sendo, ari, reyna, duke ken nangangato nga  opisial ti soldados ti mangsida kadakami! Dakayo ngay nga agkabsat?” inlastog dagiti ikan.

“Sidaen dagiti nakurapay a!” sipapangas ti maysa a nagkuna.

“Naimbag no pagbibisinan a sidaen ti tao dagita no di ket sidaen ti agmukmukat, tinimel ken inampas a pusa!”

Nagkakatawa dagiti ikan.  

Ngem, binay-an laeng da Pembo ken Snedo dagiti padada  nga  ikan.

“Ania  ngata ti aramidenda kadatayo?” adda naiyaw-awan a nagdamag.

“Ipritodatayo iti nangina ken nabanglo a manteka!”

“Ket da Pembo ken Sendo?”

“Maipritoda iti sobsobra ken naagub a manteka!” inlaaw ti maysa  ket nakatibtibong ti katkatawa dagiti ikan.

“Saan ngata nga aramidenda a bugguong dagita nga agkabsat?” adda nagdamag.

“Ay, madi a! Badarong no aramidenda dayta kadakuada. Nagkamalidan a, no bugguongenda dagita nga agkabsat,” insalpika ti maysa.

“Agkarasakes no mabugguong dagita! Nabungtit a bugguong ti pagbalinanda!” inkantiaw ti maysa.

“Iggesen ti patisda, kunam pay a!” binagi ti maysa.

Ket lalon a nakarkaro ti tibong ti katkatawa dagiti ikan. Timmangad laeng ni Pembo. Tinulad ni Sendo ti kabsatna. Immisemda idi maimatanganda manen ti sumingsingising nga init. Binuyada  laengen daytoy. 

Impan dagiti mangngalap iti  palasio dagiti nasutil, pangas, nauyaw ken nadangkok nga ikan tapno taraon ti ari, reyna  ken dagiti annakda.

Dinawis ti maysa kadagiti mangngalap da Pembo ken Sendo sana inyawid ida iti balayda.

Pudno a naiprito iti nangina a manteka dagiti naipan iti palasio. Napaksiw kadagiti baak ken nabanglo a suka dagiti dadduma.

Naituno dagiti agkabsat a Pembo ken Sendo iti nanumo a dalikan ti mangngalap a nangiyawid kadakuada.

          (Maigibusto)

Comments are closed.