Footer

Kuarta nga insentibo, scholarship, naipaay pamilia 10 natay iti ranget a soldado

TARLAC CITY – Nangipaay ti Opisina ti Presidente iti insentibo a kuarta ken scholarship para kadagiti pamilia ken annak dagiti soldado a natay iti combat mission iti simple a programa a naangay ditoy itay nabiit.

Ni Retired Maj. Gen. Arturo B. Carillo, presidential adviser on military affairs, ti nangiyawat iti cash incentives ken scholarship grants kadagiti pamilia dagiti sangapulo a soldado a natay iti pannakirangetda kadagiti kabusor ti turay bayat ti simple a programa a naangay iti Officers’ Clubhouse, Cordillera Building ti Armed Forces, Northern Luzon Command (Nolcom) idi Agosto 7 ditoy a siudad.

Inyawat pay ni Caballero ti P50,000.00 cash rewards iti innem a soldado a nakaro a nasugatan iti rupak, ken P20,000 iti 15 a kameng ti Army a nasugatan bayat iti combat missions.

Kinuna ni Carillo a maikkan iti benepisio iti edukasion dagiti kualipikado nga annak dagiti natay a soldado.

Natay bayat ti combat mission iti Abra, Ilocos Sur, Isabela ken Mountain Province da S/Sgt. Ernexto Pico, Sgt. Leony Udal, Sgt. Edmund Soriano, Pfc. Eduard Cayagoy, Pfc. Elmer Antonio, Pfc. Oliverio Viernes, Pfc. Peter Guimbal, Pfc. James Angeles, Pvt. Allan Corpuz ken Pvt. Vincie Eperanzato.

Kinuna ti maysa nga opisial ti Nolcom a naited dagitoy nga insentibo “gapu iti panangisakripisio dagitoy a soldado ti biagda iti pannakirupakda kadagiti terorista iti nadumaduma a lugar  iti intero a Northern Luzon regions manipud iti Central Luzon agingga iti Cordillera, Mountain Province, Ilocos ken Cagayan Valley a saklaw ti area of responsibility ti Nolcom.

Kinuna met ni Lt. Gen. Rodrigo Maclang, Nolcom commanding general, a babaen ti nasao a cash incentive ken scholarship grants, maitag-ay ti moral ken pagimbagan dagiti soldado.#

Comments are closed.