Footer

LGUs, awan programada iti pannakaipangato ti puli dagiti nuang?

SAN FERNANDO, La Union – Linagidaw ti maysa nga opisial ti Philippine Carabao Center ditoy rehion ti mapapati a kaawan ti programa iti large ruminants upgrading dagiti kaaduan a local government units iti napalabas a 10-15 a tawen.

Kinuna ni Center Director a nakabase iti MMSU, Batac Grace Marjorie Recta a daytoy ti obserbasion ti PCC idinto nga innayonna a kurang pay ti promotional support dagiti LGUs iti daytoy a programa ket kasapulan a maaddaanda iti  medium term multi-livestock development plan ken agbalinda nga aktibo a makipartisipar iti pannakamonitor iti sasaaden dagiti maiwaras a toro.

Tapno lalo pay a pumintas ti puli dagiti nuang iti pagilian, inwaragawag ni Recta nga agtultuloy dagiti programa ti ahenaia a pannakaidur-as ti nuang.

Inyunay-unay ni Recta a maysa ti nuang kadagiti animal a no maparti ket adda amin usar dagiti partesna ta malaksid iti karne, mausar pay iti craft making dagiti tulang, sara, dapan, lalat ken buok daytoy idinto a nasustansia ti gatas ti nuang a napintas a pangrupak iti malnutrision ken mabalin pay a maaramid a kas milk choco ken dadduma pay a processed products.

Kinuna ni Recta a maysa pay a programa ti PCC ti bull dispersal program wenno panangitedda iti toro a nuang iti asosasion nga addaan iti 25 a kabay-an a nuang ken ti panangisayangkatda iti artificial insemination (AI) wenno panagsumpit tapno nadardaras ti yaadu ti pulida.

Mangisaysayangkatda pay iti trainings kadagiti mayat nga agbalin a farm-based technicians a tumulong iti ahensiada iti panagisayangkatda iti AI, segun ken ni Recta.

“Agbalin a kanayonan a sapul dagiti mannalon no gatasanda dagiti nuangda ta iti agdama, mailako iti P40 iti kada litro ti gatas ti nuang,” kinuna ni Recta.

Irekrekomenda pay ti PCC  ti pannakaprivatize ti AI Project ket agsingirda iti P500 tunggal masumpitan a nuang tapno adda panagsustiner kadagiti programa ti ahensia.

Kabayatanna, kas maibasar iti datus ti ahensia itay Enero itoy a tawen, adda nailistada a 135,200 a bilang dagiti nuang iti sibubukel a Rehion Uno, nangatngato iti .21% no ikumpara iti bilang ti nuang iti napalpalabas a tawen.#

Comments are closed.