Footer

SALAYSAY: ITI INDAYON NI LAGIP: Ti Kateksmeytko (Tuloyna)

Nagpakadakami ken ni Anti ket nagsublikami idiay Dagupan. Bayat nga agtartaray ti luganmi, saan a matagtagari ni Bernard. Diak metten nagtimtimek. Ngem makabibineg ti ulimek iti nagbaetanmi, Manong Danny.

Kasta ti napasamak iti damomi a panagkita ken ni Bernard.

Nadanon ti panagkasangayko.  Diak ninamnama nga awagann ken kablaawannak ni Bernard.  Nagpadispensar gapu iti impakitana ken ni Anti. Nagkari a balbaliwanna ti ugalina.

Inikkak iti gundaway nga agbalbaliw. 

Manipud idi, agsasallupangen dagiti textna.  Pasaray pay agtinnawagkami ta mailiwkami a makangeg iti boses ti tunggal maysa kadakami.

Mariknak a matnagen ti riknak ken ni Bernard, Manong Danny.

Kiniddaw ni Bernard nga agkitakami manen. Immannugotak. Nagpakuyogak iti maysa a gayyemko.

Iti Nepo Mall iti Dagupan City ti nagsasarakanmi.  Ngem nakaluksaw ni Bernard idi makitana nga adda kaduak. Agkakasakit a balikas ti imparupana kaniak iti pay met sanguanan ti gayyemko.   Napaluaak iti bainko iti gayyemko ken kadagiti tattao a nakangeg iti panagbassawangna. 

Idi maallangonna ti riknana, nagpakawan ni Bernard.

“Yana, mahal kita, mag-usap tayo, sorry kung nasaktan kita,”  kinunana.

Saannak a simmungbat. Ginuyodnak ketdi ti gayyemko tapno pumanawkamin. Ngem inggawidnak ni Bernard. Nagpakaasi nga agpatangkami.

Inyadayonak ni Jacque.

“Yana, bakit ka pumatol sa ganyang lalaki?  Mas mabuting layuan mo na siya. Tingnan mo, ngayon pa lang, trinato ka nang parang basahan. Hindi karapat-dapat para sa iyo ang isang katulad niya,” ballakad kaniak ni Jacque.

“Mag-uusap muna kami,” insungbatko.

“Ikaw ang bahala, basta magkaproblema ka, andito lang ako.  Yana, tandaan mo, sa teks mo lang siya nakilala. Alam kong hindi mo siya mahal.  Ginagamit mo lang siya para makalimutan ang unang pag-ibig mo.  Sa ginagawa mong yan, ikaw lang ang kawawa sa bandang huli,” impalagip kaniak ni Jacque.

Inyawis ni Bernard ti iseserrekmi iti pagsinean tapno nawaywayakami nga agpatang. Forever My Love ti maipabpabuya.

Nagbati ni Jacque iti ruar ti pagsinean. Imbagana nga urayennak.  Ngem nasirmatak iti rupana ti saanna nga ikakanunong iti isusurotko ken ni Bernard.

Bayat ti panagpatpatangmi, nariknak ti ima ni Bernard a naipatay iti abagak.  Nariknak ti nabara a sang-awna iti tengngedko idinto nga inawidnak.  Inakkalko ti takiagna iti abagak ket kimmayakayak.

Iti dayta a kanito,  naamirisko a dinak ay-ayaten ni Bernard. No pudno nga ay-ayatennak, raemennak koma.   Inurayna pay koma ti panakaluom toy riknak tapno nasamsam-it ti panagbukar ti ayatko kenkuana.

Nagpinnaliiwkami iti nabayag.  Diak nakaibtur ket binurakko ti ulimek iti nagbaetanmi.  Nagpadispensarak kenkuana.

Ngem iti dayta nga imbalikasko, napatured la ket ngarud ni Bernard. Inrakusna manen ti takiagna iti abagak ket ginandatnak nga agkan.  Ngem induronko ta diak maitured   ti agpabus-oy kenkuana.

“Yana, umuwi ka na at huwag no na ako kateks kahit kailan.  Huwag kang mag-alala, hindi ako galit sa iyo.  Patawarin mo ako sa mga binitiwan kong masasakit na salita.  Talagang mahal kita at gusto kitang makasama pero hindi mo pala ako mahal,”  kinunana.

“Hindi ako nagagalit sa iyo,” nakunak. “Kaya lang hindi pa ako handang gumawa ng isang bagay na baka pagsisihan ko.”

Saankon nga inuray ti sungbatna. Timmakderak ket intarengtengkon ti rimmuar iti pagsinean.

Iti ruar, adda pay laeng nga agur-uray ni Jacque.  Saanen a nagusisa ngem ammok nga ammona ti pannakapekka ti langenlangenmi ken ni Bernard.

Ngem dakkel a leksion ti imbati ti panagteksmeytmi ken ni Bernard. Natakuatak a saan a maysa laeng nga ay-ayam ti ayat. Tapno agrangpaya ti ayat, kasapulan ti kaadda ti panagraem ken panangilala iti tunggal maysa. Saan nga ayat ti inruknoy kaniak ni Bernard, ta no pudpudno nga ay-ayatennak, rinaemna koma ti kinababaik.

Ala kastan, Manong Danny,   sapay koma ta nakaitedak ii bassit a linglingay ken adal kadagiti naruay a mangtartarabay kenka.

Toy pagayammo

Yana iti Pangasinan

Comments are closed.