Footer

EDITORIAL: Ibbong manen dagiti atletatayo iti Olympic Games

Iti iruruar daytoy, nalpasen ti maika-29 nga Olympic Games a naangay iti Beijing,China. Ti nakakalkaldaang, agawid dagiti athletatayo nga awan uray maysa a medalia a naiyukkor iti tengngedda.

Sangapulo ket lima nga atleta ti imbaon ti pagilian iti Olympic Games. Ngem sangkabassit ti naited kadakuada a tsansa nga adda maiyawidda a medalia.

Kinapudnona, tallo laeng nga atleta ti adda namnamana a makaiyawid iti medalia, ni Harry Tañamor iti boksing, ken da Mary Antoinette Rivero ken Tshomlee Go iti taekwondo jin. Awan a pulos ti tsansa dagiti sangapulo ket dua pay nga atleta iti pakisalipanda nga ay-ayam kas  ken ni  Mark Javier (archery), Henry Dagmil (athletics), Maristella Torres (athletics), Miguel Molina (swimming), James Wlsh (swimming), Ryan Arabejo (swimming), Daniel Coakley (swimming), Christel Simms (swimming), Rexel Ryan Fabriga (diving),Sheila Mae Perez (diving), Eric Ang (shooting) ken Hidilyn Diaz (weightlifting).

No kasta, apay ngarud nga imbaon pay ida ti pagilian a makisalip iti Olympic Games? Tapno mangalada iti exposure iti international competition.

Kas ninamnama, saan a nakalusot dagitoy iti umuna pay la a rikus ti salip.

Uray ni Tañamor a beterano iti Olympic Games, nanabtuog iti umuna pay la a pannakirangetna.

Kakas-angan ti napasamak kada Go ken Rivero. Nagsagana dagiti dua, “kaarigda iti dimmalan iti impierno” kas kuna ni Coach Rocky Samson ngem iti baet ti panangipakatda iti amin a kabaelanda, rimbaw dagiti nalalaing a kinasangoda ket saanda met a nakapan iti maikadua a round.

Iti panagawid dagiti atletatayo nga ima-ima, agtultuloy latta a kasla layap a narigat a matiliw ti arapaap ti tunggal a Filipino nga adda kailianda a tumakder iti plataporma ti balligi ken maipatayab ti nailian a kanta tapno mangeg ken idir-i ti sibubukel a lubong.

Kinuna ni Pres. Arroyo idi parubuatanna ida a mapan makisalip iti Olympic Games: “No mapanka makisalip, wenno mapalubosanka a makisalip iti Olympic Games, kampeonkan… kampeondan sakbay pay a mangrugi iti ay-ayam.”

Makapabussog ngem pakunsuelo a pammatibker agsipud ta ammo dagiti turayentayo nga agdalan dagiti atletatayo iti abut ti dagum iti pannakisalipda kadagiti kalalaingan nga umaaayam dagiti nadumaduma a pagilian iti lubong.

Manamnama ketdi a sumaruno ti panagtitinnudo dagiti opisial dagiti nadumaduma nga sports organizations iti pakaidas-alan iti pammabasol iti nakakaldaang a nagbanagan dagiti atletatayo iti pagilian iti Olympic Games.

Daanen a plaka dayta. Ti ketdi kinapudno: agkurkurang  ti suporta a maited kadagiti lokal nga atletatayo tapno dumur-as ken maipangato ti kabaelanda.

Kaano nga agriing dagiti opisial dagiti sports organizations?#

 

Comments are closed.