Footer

PITIK: Metro Vigan Coordinating Council: pagkikinnamayyetan para iti panagdur-as

Agpipinnirma inton Septiembre 8 dagiti mayor ti pito nga ili ken maysa a siudad iti memorandum of agreement para iti pannakabuangay ti Metro Vigan Coordinating Council. Daytoy ti maibilang a kadakkelan a pagteng iti probinsia ken posible iti amianan ti Metro Manila ken kalpasan ti pannakaselebrar ti maika-250 a tawen ti Diocese ti Nueva Segovia ken iti panagsiudad ti Vigan City.

Signipikante daytoy naituding nga aldaw a panagpipinnirma dagiti  chief executives iti memorandum of agreement agsipud ta malaksid nga aldaw ni Birhen Maria, iti daytoy pay nga aldaw ti pannakaselebrar ti World Heritage Cities Solidarity Day.

“Nagpintas ti significancena, miembro ti Vigan City iti World Heritage Cities ket (iti pannakabuangay ti MVCC) saan laeng nga in solidarity with the world heritage cities ngem daytoyton in solidarity with our brothers and sisters in the Metro Vigan area,” kinuna ni Vice Mayor Franz Ranches.

Iti dua nga aldaw nga strategic planning workshop a naangay iti Sea and Sky Hotel and Restaurant iti San Fernando City, napormar ti MVCC ken napormular ti bision daytoy ket babaen ti nabuangay a technical working group, naipinal dagiti dokumento kas iti memorandum of agreement a pagpipinnirmaan dagiti agkameng iti nasao a council.

Walo amin dagiti agkameng iti MVCC: Vigan City, Caoayan, Bantay, Santa, San Vicente, Sta. Catalina, San Ildefonso, ken Sto. Domingo.

Ania ngamin ti pakaisaluminaan daytoy Metro Vigan Coordinating Council kadagiti sabsabalin a council a nabangon wenno nabuangay kadagiti nadumaduma a paset ti pagilian?

Kinapudnona, idi nairuangan ti pannakabuangay kadakuada ti maysa a coordinating council a buklen dagiti nadakamat nga il-ili ken siudad, saan a dagus a nangited iti yaabuloy dagiti local chief executives.

Saan a mapabasol dagiti ama ti ili no adda man immapay a  panagduadua kadakuada no ania ti “naun-uneg” a panggep ti nasao a council.

Adda panagguddengda agsipud iti amakda a maikkatan ti bilegda a kas mayor ken iti posible a “panangalun-on” kadakuada ti siudad ti Vigan no mapormar ti nasao a council.

Ngem iti panagpasiar da Vice Mayor Ranches kadagiti pito nga ili, impatalgedda nga awan ti kasta a panggep ti council no di ket panagkakammayyet, panagtitinnulongda kas maymaysa a grupo tapno iti kasta, napigpigsada iti global competition.

Iti met pannakipatang ni Mayor Eva Marie S. Medina kadagiti padana a mayor, impatalgedna nga awan ti nangatngato nga opisial no mabuangay ti nasao a council.

“It is called a coordinating council, nobody is above anybody,” kinuna lni Mayor Medina idinto nga inyunay-unayna nga isu laeng ti nangirusat iti pannakabuangayna ket no mabukel, “awanto ti nangatngato ngem aniaman nga ili wenno siudad” ket “agpapatasto amin nga agkameng.”

Kinuna pay ni Mayor Medina nga awanto ti permanente a mangidaulo iti council ket agsisinnublat dagiti mayor a mangiggem iti rienda daytoy.

“No daytoyto ti mapagnunummuan iti strategic planning workshop, we will follow it,” kinuna ti mayora idinto nga impatalgedna nga “aniaman ti pagnunummuan ti kaaduan ti masurot.”

Iti panangawis ni Mayor Medina kadagiti kabaddungalanna, kinunana a babaen ti nasao a council, maibinsabinsa dagiti areas of cooperation a maaramid iti nagbabaetan dagiti munmunisipio ken siudad ti Vigan a pagibasaran iti panangidawatda ken ni Cong. Ronald Singson a mangipila iti maysa a gakat a mamagbalin iti MVCC a maysa a linteg.

“No addan linteg a mangbayabay kadagiti makimiembro, maikkan ti MVCC iti legal a personalidad  ken nalaklakanton ti implementasion dagiti aniaman a pagkakammayyetan nga aktibidad, proyekto ken programa,” kinuna ni Mayor Medina.

Kinuna ni Vice Mayor Ranches a maysa a grouping ti MVCC ket saanto a patangan ti traffic wenno urnos ken talna  no di pay patanganto mainaig iti ekonomia ken sosial a panagdur-as kadagiti maseknan nga il-ili ken siudad ti maikkan iti importansia.

Nupay ad-adda nga agiray ti bise mayor iti Metro Naga Coordinating Council a kas modelo iti pannakaisagana ti MVCC, kinunana a “rekognisarenmi a daytoy (MVCC) sabali, ket aramidenmi nga uniko, nga applicable laeng iti areatayo…”

Kinuna ti bise mayor a naitudodan dagiti pagpigsaan ken pagkapsutan dagiti agkameng iti council ket ti panagdependeda iti internal revenue allotment ti common a pagkapsutanda.

Nupay kasta, adda dagiti area a pagpigsaan dagiti agkameng nga ili kas iti Sta. Catalina a maysa a vegetable producer, ti Santa kas eco-tourism site, ti San Vicente kas agar-aramid iti muebles ken dadduma pay.

“Babaen ti MVCC, we will maximize the utilization of available resources within the area…” kinuna ti bise mayor.

Iti maudi a miting ti technical working group nga idauluan ni Vice Mayor Ranches, napagpapatanganda ti hierarchy organizational chart  ti MVCC, no kasano ti representasion ti kada ili, kasano ti panag-chairman ken kualipikasion dagiti agkameng iti board ken staff.

Namnamaen ni Vice Mayor Ranches a maipinalen ti technical working group nga idauluanna no ania dagiti areas of cooperation a pakaibatayan ti vision-pillars tapno nalawag ti memorandum of agreement a pagpipinnirmaan dagiti mamayor inton Septiembre 8.

Napintas dagiti panggep para iti panagtitipkel dagiti pito nga ili ken maysa a siudad para panagdur-asda ken napigpigsa a pannakibalubalda iti world market.

Saluduanmi dagiti nangilungalong iti daytoy a gannuat. Mabuhay kayo!#

 

Comments are closed.