Footer

Produkto ti Ilocos Sur, nakiddaw a maipaset iti trade fair

VIGAN CITY – Kiniddaw ti provincial director ti Department of Trade and Industry ti pannakipaset dagiti amin nga ili ditoy probinsia babaen ti produktoda iti maangay a trade fair iti Metro Manila.

Indagadag ni DTI provincial director Grace Lapastora a maipaset amin a produkto ti probinsia nangruna kadagiti nairehistro a one town one product ti tunggal ili ken dagiti dadduma pay a produkto a tinulongan ti Department of Trade and Industry iti Tawid ken Partuat Trade Fair a maangay iti SM Megamall inton Nobiembre 5-9.

Segun ken  ni Lapastora, para met laeng kadagiti negosiante daytoy ta malaksid a maipakitada dagiti produktoda iti ruar ti probinsia, maammuanda pay ti komento dagiti aggatang maipanggep iti produktoda a makatulong tapno lalo pay a mapapintas ken mapapigsa ti pannakailako dagitoy iti merkado.

Kinuna ti provincial director a saan a paudi dagiti aggapu iti Ilocos Sur kas ipasimudaag ti panagbalin dagitoy a maysa kadagiti kangatuan ti nalako iti napalabas a Luzon Island Trade Fair.

“Masapul nga agsisinnuportatayo. Adda iti ruar ti probinsia ti dakkel a gundaway para kadagiti produktotayo,” kinuna pay ti provincial director.

Kinuna ni Lapastora a napintas a pangipromotan dagiti produkto ditoy probinsia iti Tawid ken Partuat Trade Fair ta awan ti bayadan iti puesto a gagangay nga umabot iti P5,000-P10,000 kadagiti sabsabali a lugar.

Naammuan ken ni Lapastora nga inkari metten ni Gob. DV Savellano nga isu ti makaammo iti pannakabunag dagiti produkto a mairaman iti trade fair, kasta pay a makigudua gobierno probinsial iti aniaman a gastos ti tunggal booth.

Karaman kadagiti manamnama a makipaset iti trade fair ti squash noodles ti Sto. Domingo, longganisa ti Vigan City, bagnet ti Narvacan, suka manipud unas ti Sta. Maria, kalamay ti Candon City, tapey ti Lidlidda ken San Emilio, processed calamansi ti Tagudin, nata de coco ti San Esteban, processed peanut ti Sta. Lucia, banana chips ti Banayoyo, laya ti del Pilar, suka ti Alilem, ube ti Sugpon, organically produced a natnateng ti Sta. Catalina, yellow corn ti Sta. Cruz, kape ti Sigay ken bagas ti Burgos.#

 

Comments are closed.