Footer

SALAYSAY: Dagiti kagasatan amin kadagiti ikan (Maudi a paset)

Ngem saan a sinda ti pamilia ti mangngalap da Pembo ken Sendo no di ket inkabil ida ti ina a nagtuno kadakuada iti basket a sisasador pay laeng. Isagpawnanto kano ida iti dengdengenna no bigat.

Aldaw kabigatanna, agisagsaganan ti ina iti idengdengna idi sumangpet ti buridekna nga agal-al-al gapu iti panagdardarasna a nagawid.

“Innak met dumngeg iti pannursuro ti kunkunada a Maestro, inang!” kinuna ti ubing a lalaki.

“Ammom aya no sadino ti yanda? Amangan no marabianka, anakko?”

“Ammok no sadino ti pagsersermonan ti Maestro, inang. Pangaasiyo ta palubosandak koma. Kayatko met a mangngegan ti pannursuro ti Maestro.”

“Agpakadaka ngarud ken tatangmo, adda dita sipi nga agin-inana ta mapanto manen agkalap no rabii.’

Dumdumngeg gayam ti ama, ket kinunana: “Sige, mapanka, anakko, ngem saanka koma nga agparparabii ta dimonto ket masagang dagiti tulisan.”

“Agbalonak, inang, amang!” kinuna  ketdi ti ubing.

“Ania  ngarud ti sidam?”

“Itedmo dagita natunon, baket. Kilnatem laengen dagita nateng a pagbingayanta,” balakad ti ama.

Inted ti ina dagiti tinuno nga  ikan a da Pembo ken Sendo iti anakna ken pinabalonanna daytoy iti lima a tinapay.

Naayatan ken naragsakan ti ubing a dimngeg kadagiti pannursuro ti kunkunada a Maestro.

Idi mumalemen, nangngeg ti ubing a kinuna ti maysa kadagiti kadua ti Maestro, “Sumipngeten ket awan matagtagitao ditoy. Pagawidemon dagiti tattao a mapan kadagiti barbario tapno gumatangda iti kanenda.”

“Saan a masapul a pumanawda,” kuna ti mannursuro, “dakayo ketdi ti mangted iti kanenda.”

“Sadino ngarud ti pangalaantayo iti ipakan kadakuada?”sinaludsod ti maysa kadagiti kadua ti manursuro.

“Adda maysa nga ubing a lalaki ditoy nga adda awitna a lima a tinapay ken dua nga  ikan,” insungbat ti maysa.

“Yegyo ditoy,” kinuna ti Maestro.

Immasideg ti ubing a lalaki ket inyawatna iti Maestro da natunon a Pembo ken Sendo ken ti lima a tinapay a balonna.

Pinagtugaw ti Maestro dagiti tattao iti karuotan. Innalana dagiti tinapay ken da Pembo ken Sendo, timmangad sadi langit, sa nagyaman iti Dios. Pinispisina dagiti tinapay ket intedna kadagiti adalan tapno ibunongda kadagiti tattao. Nanganda amin ket nabsogda. Aglimaribu a lallaki ti nangan, malaksid kadagiti babbai ken ubbing.

Adda sangapulo ket dua a basket a napno kadagiti natda nga inurnong dagiti adalan.

Nagsabat dagiti mata ti Maestro ken ti ubing. Immapon ti naisangsangayan a rikna iti ubing ket siraragsak a nagpakada iti Maestro tapnon aggawid.

Kadagiti ikan a napangas a naipan iti palasio, sinda ida ti ari, reyna, dagiti mamasirib ken nangangato nga opisial. Kada Pembo ken ken Sendo, sinda dagiti tattao nga awanan iti makan ken ti pudpudno nga ari.

No asino ti immuna, isunto met laeng ti maud-udi, ket daydiay  maudi, isunto met laeng ti umuna. Ta  iti lubong, inawaten dagiti aglaplapusanan ti gunggonada…

Makitatayo iti sarsarita a dagiti maawagan iti immuna ket dagiti aglaplapusanan a dina ammo a taliawen dagiti kapadada. Ket iti idadateng ti panungpalan, dagiti maud-udi (awanan idi) isuda met ti kangrunaan.

Panagririnnanod, panagtitinnulong ken panagmaymaysa ti bugas daytoy a sarsarita.#

 

Comments are closed.