Footer

SALAYSAY: ITI INDAYON NI LAGIP: Adda Naituding a Kaikarian (Umuna a paset)

Dear Manong Danny,

Tunggal parsua a tumaud ditoy lubong, adda  naituding a kaikarianna. Naiprograman dagiti dumteng iti biagna, kas panangiprograma iti selpon ti ipatulod a mensahe iti papananna a destinasion. Mabalin nga ababa wenno atiddog ti biagna ditoy rabaw ti daga a pagkarayamanna. Ta adda naiparsua a masapa a matay, adda met arig tallikudannan ti init ngem nakayakay ni patay.  Adda met agballigi wenno mapaay iti direksion a turongenna.

Ita, sublianta man ti 1978,  tawen a pannakakitak iti kinangayed ‘ toy lubong. Naiyanakak a nakutiil wenno kullapit nga ubing, Manong Danny. Iti ababa a sarita, malnourished ket kinuna pay ni tatang a dina ninamnama a madanonko ti kastoy a biagko iti agdama.

Nakurapay ti adda a panagbiagmi. Makitaltalon laeng ti amak.  Agkulot ken ag-manicure ti inak. No awan ti serbisan ni nanangko, mapanna tulongan idiay talon ti amak.

Gapu ta marigatan ni tatang iti kaadu ti trabahona idiay talon, innalana ni Dodong a kaduana a mangtaming kadagiti mulana a tabako a birhinia. Kalugaranmi met laeng ni Dodong. Baro, maskulado, naguapo ken napintek ti takderna a lalaki.

Dakkel ti akem ni Dodong iti panagbaliw ti ordinario a panagbiagmi. Naammuak daytoy babaen met laeng ti panangestoria kaniak ni tatang.

Kinuna ni Tatang nga imbilangna a kas kabsat ni Dodong. Ngem dina impagarup nga agbalin ni Dodong nga uleg a nangarpuog iti naulimek a panagbiagmi. 

Segun ken ni tatang, natnag ti rikna ni nanang ken ni Dodong. Mabalin siguro gapu iti kinataerna a dakkel a pakaarusan ni tatang. Malaksid a narapis ni  tatang, natiltil iti trabaho iti talon ket adayo a nalaklakay ti langana ngem iti tawenna. Ken gapu ngata iti kaadu ti trabahona, dinan naasikaso ni nanang.  Babaiak ket ammok a kasapulan met ni nanang ti pammateg ti asawa nangruna iti sanguanan ti rigat.

Segun ken ni tatang, maysa ket gudua laeng ti tawenko idi nakitaray ni nanangko ken ni Manong Dodong.

Kasla nalpes nga uong ni tatang iti kasta a napasamak iti biagmi. Nasumokna ti uminom. Nabaybay-anna dagiti trabahona iti talon.

Pagyamanak ta uray kasta ti napasamakna, dinak binaybay-an. Isu ti nagbalin a pannakainak. Inan-anusannak a tinagibi nga awan a pulos ti pannarabay ti nakitaray nga inak.

Naglabas dagiti tawen. Idi agtawenak iti innem, simrekak a grade one iti eskuela. Idi damok iti pagadalan, intulodnak ni tatang. Inur-uraynak agingga iti nalpas ti klasemi iti aldaw. Iti malem, intulodnak manen ket naguray iti ruar ti kuartomi agingga iti panagawidmi. Isu pay ketdi ti sentro ti sutil gapu ta pasig nga inna ti nangitulod-nangsukon kadagiti annakda.

Ngem manipud nakitaray, awan uray ni balikas pay a naggapu ken ni Nanang. Linipatnakami a naminpinsan ken ni tatang.

        (Adda tuloyna)