Footer

SALAYSAY: Same-sex, dadaelenna kinasagrado ti kallaysa?

Kalintegan ti tungtongan, daytoy ti ikkis ken ilablaban ti Pride, maysa a komunidad dagiti lesbian (tomboy), gay (bakla), transgender (nagbaliw iti mabagbagi) ken bi-sexual (hermaphrodite, agpada nga addaan) wenno maw-awagan iti LGTB. Maysa a worldwide wenno sangkalubongan a grupo ti Pride. Maibilang ti grupoda a kas komunidad.

Iti agdama, addan duapulo ket uppat a nasion a nangbigbig iti legal a panangbigbig iti panagtipon (legal recognition of union) ti same-sex. Adda met siam nga estado ti USA nga agdedebate pay laeng iti daytoy nga isyo.

Ngem itay Mayo 15 itoy a tawen, inaprobaran ti Estado ti California, ti same-sex marriage. Simmaruno ti Colorado iti Massachusetts a nangaprobar iti same-sex marriage idi 2004.

"We cannot accept the view that Amendment 2's prohibition on specific legal protections does no more than deprive homosexuals of special rights. To the contrary, the amendment imposes a special disability on those persons alone. Homosexuals are forbidden the safeguards that others enjoy or may seek without constraint," kastoy ti insurat ni Justice Anthony Kennedy iti desision para iti U.S. Supreme Court.

Iti agdama, addan innem a nasion a mangipalubos iti same-sex marriage. Immuna ti Norway, sinaruno ti Belgium  sa ti Canada, Spain, The Netherlands ken South Africa.

Nakadidillaw ditoy ti Spain. Daytoy a pagilian ti nangiyam-ammo iti kristianismo iti pagiliantayo, ngem maysa kadagiti innem a nasion a nangilukat ti ridawna iti panagkallaysa ti same-sex.

Nupay kasta, adun dagiti nasion a nangbigbig iti legal a panagtipon (legal union) ken cohabitation  (panagdenna iti maymaysa a bubong) ti same-sex.

Dagitoy sumaganad dagiti isyo nga  imparang dagiti kontra iti same-sex marriage:

1. Maysa nga institusion ti kallaysa ket para laeng iti lalaki ken babai.

2. Ti same-sex ket dida makapatanor iti anak

3. Immoral

4. Pro-creation ken pannigurado iti panagtultuloy ti sangkataoan

5.  Dadaelen ti same-sex marriage ti kinasagrado ti institusion ti kallaysa

6. Di pay napadasan a social experiment

7. Panagraira ti incest, bestial marriage, polygamy ken kaarngina

 8. Maysa laeng daytoy nga espesial a kalintegan a saan a maibilang a napintek a kalintegan

9. Pannakaadda ti benepisio a kas iti opposite-sex

10. Pannakaipapilit ti kalinteganda nga agkallaysa iti simbaan a kontra iti pagalagadan ti simbaan.

Saggaysa a kinontra dagiti mangidardarirag iti same-sex marriage dagiti nadakamat iti ngato:

1. Maysa nga institusion ti kallaysa ket para laeng iti lalaki ken babai. Saan a nalawag ti depinision ti balikas a marriage no sino ti ‘sino’ ken dagiti mabalin ken makabael nga agkallaysa, a kas iti asino ti agtagikua iti kuarta iti uneg ti bangko, ti nagdeposito wenno ti bangko.

2) Ti same-sex ket dida makapatanor iti anak. Saan a  balido nga argumento daytoy. Kasanon ti babai ken lalaki a nagasawa ken dida  naaddaan iti anak, agsinada? Maysa a nakakatkatawa nga argumento nga awan ti pakaibasaranna, kuna dagiti kontra iti same-sex marriage. Uray kano dagiti LGTB ket kabaelanda ti agpatanor iti anak babaen ti panangadaptarda iti ubing. Saan nga agbatay ti isyo ti panangpatanor iti ubing iti lalaki ken babai no di iti ayat ken pammateg. Adda dagiti nagannak a  naulpit, nangbaybay-a ken nangpanaw kadagiti annakda ken adda met dagiti LGTB a nadungngo kadagiti ubbing lalo kadagiti nagampon ken nangibilang a kas anakda ti amponda.

3) Immoral. Kuna ti Biblia? Saan laeng a Kristianismo ti major religion iti lubong. Saan a maikanatad nga isyo ti panangibasar iti Biblia ta saan  met a kameng amin nga LGTB  iti kristianismo. Adda  makunkuna a separation of the church and the state ken freedom of religion.

4.) Pro-creation ken pannigurado iti panagtultuloy ti sangkataoan. Saan latta a balido a rason daytoy, kuna dagiti kontra. Kasanon dagiti lupes ken saan a makaanak a lalaki wenno babai,  mapalubosanda nga agassawa wenno agkallaysa? Saan met kano nga endangered species ti tao,  kinapudnona, nagdaras pay ketdi nga umadu ti populasion.

         (Maigibusto)