Footer

Commercial complex iti Narvacan, manamnama a malpas iti Oktubre

NARVACAN, Ilocos Sur –  Addan iti finishing stage ti commercial complex a manamnama a mangted iti dakdakkel a pamastrekan ti ili, segun iti mayor ditoy.

Iti interbio kenkuana ti DZTP Radio Tirad Pass itay nabiit, kinuna ni Mayor Edgar Zaragoza a manamnama a malpas ti tiendaan iti Oktubre ket aglukat inton Nobiembre daytoy a tawen.

“Nagasatkami ta umay agnegosio ditoy dagiti dadakkel a negosio kas  ti JTC ken ti Magic ta isuda ti mangipatakder iti supermarket,” kinuna ti mayor.

Kinunana a malaksid iti supermarket, adda pay agnegosio nga appliance center a dandani kagudua ti building ti upaanda.

“Namnamaenmi nga arakento dagiti tao ti commercial complex ta addanto amin ditoy dagiti kasapulan a magatang,” kinuna ni Zaragoza.

Inaklon ni Mayor Zaragoza a ti pannakaipatakder ti maysa a commercial complex iti Narvacan ti maysa nga addangda iti tarigagayda a panagsiudad daytoy.

“Masapul nga agaramidkami iti addang a mangpapartak iti progreso ditoy a makatulong iti panagsiudad ti Narvacan, Ilocos Sur,” kinuna ni Zaragoza.

Kinunana pay a saan a mapaserraan ti agdama a merkado publikoda no di ket agtultuloy ti operasionna.

“Saan a daytoy ti tarigagaytayo, narigat met a ma-displace dagiti agdama nga agnegnegosio ditoy.  Saan laeng ngamin a para Narvacan no di ket kadagiti kabangibangtayo nga ili ken probinsia ti commercial complex,” inyunay-unay ni Zaragoza.#

Comments are closed.