Footer

EDITORIAL: Nagkadua a tadem ti hustisia?

Krinitikar ni Senate Minority Leader Aquilino Pimentel ti agparparang a nagkadua a tadem ti hustisia ken ni Sen. Antonio Trillanes IV gapu iti panangibasura ti Korte Suprema iti petision daytoy nga akmenna ti pagrebbenganna a kas senador kabayatan a madengdengngeg dagiti pammabasol maikontra kenkuana.

Kinuna ni Pimentel a saan pay a napaneknekan ken sinentensiaan ti korte a nakabasol ni Trillanes iti nakaisaklanganna ket rumbeng a mapalubosan a mangakem kadagiti pagrebbenganna iti Senado agsipud ta maysa a duly elected a senador a binutosan ti nasurok 11 milion a botante.

Segun ken ni Pimentel,  agparparang a double standard ti pannakaipakat ti hustisia ken ni Trillanes agsipud ta adda maysa a dati nga opisial iti Autonomous Region of Muslim Mindanao, ni Nur Misuari, a naisaklang iti rebellion ngem napalubosan nga agpiansa.

Saan a mapiansaan ti kaso da Trillanes ken ni dati a gobernador ti ARMM Nur Misuari.

Madakamat ditoy nga idi indeklara ni Misuari ti rebellion maikontra iti gobierno idi Nobiembre 2001, nasurok a sangagasut a tattao ti nagudas kadagiti rinnupak iti nagbaetan ti MNLF ken dagiti soldado ti gobierno.

Iti sabali a bangir, indauluan da Trillanes ti Oakwood mutiny iti Makati ken sinakupda ti Manila Peninsula Hotel idi Nobiembre 20, 2007 a puon ti nakaibaludanna ken pannakaisaklangna iti korte.

Idi eleksion idi Mayo 2007, nagkandidato ni Trillanes para senador ket nangabak. Nasurok nga 11 milion dagiti nangibutos kenkuana.

Ngem kinuna ti Korte Suprema a saan a maakem ni Trillanes ti pagrebbenganna a kas senador gapu iti agdama a kaso a nakaisaklanganna.

"Sumangsango ni Misuari iti rebellion idinto a panaggandat iti kudeta ken ni Trillanes, agpada a di mapiansaan a kaso, ngem iti kaso ni Misuari, timmaliaw ti gobierno iti likudna ket binay-anna daytoy a siwayawaya,” kinuna ni Pimentel.

Innayon ti senador nga iti biang ni Trillanes, narusanger ken saan a konstitusional ti saan a pannakaipangag iti petisionna nga agatendar ken makipartisipar kadagiti session  iti Senado ken miting ken hearings dagiti komite.

Krinitikar pay ni Pimentel ti mapapati a panangpanggep dagiti sumagmamano a kaaliado ti Malakaniang a mangikkat ken ni Trillanes a kas senador gapu iti pangngeddeng ti Korte Suprema a saan a mapalubosan a mangakem kadagiti pagrebbenganna.

Kinuna ni Pimentel nga “agliklikig ti Korte Suprema iti beddeng a mangsalungasing iti kinawaya ti Senado” no agtultuloy a maipaidam ken ni Trillanes dagiti kalinteganna.

Urayentayo no taliawen ti Korte Suprema dagitoy makaipas a balikas ti maysa a senador a mangkritkritikar iti pangngeddengna.#

 

Comments are closed.