Footer

Housing project, maipasdek iti Candon City

CANDON CITY – Kinuna ti mayor ditoy a maiyawat dagiti housing units kadagiti aplikante a nakapasa kadagiti requirements apaman a malpas ti pannakailawa ti kalsada iti Barangay Bagani Ubbog ditoy siudad.

Naammuan ken ni Mayor Allen Singson bayat ti interbio ti media kenkuana itay nabiit a madama ti road widening ken pannakaileppas ti drainage canal ti housing project ti gobierno ti siudad  iti nadakamat a barangay.

Segun iti mayor, ur-urayenda laengen ti kumpirmasion manipud iti City Engineer’s Office no maileppasdan amin a nailanad iti quality guidelines kas intuyang ti National Housing Authority (NHA).

“Apaman a malpasda, mabalinton a maiyawat dagiti housing units kadagiti aplikante a makapasa iti requirements,” kinuna ni Singson.

Aglawa iti maysa nga ektaria ti nasao a housing project.

Kabayatanna, kinuna ni Singson nga agtultuloy ti panagiwarasna iti school bags kadagiti amin nga agbasbasa iti Grade I iti pagadalan pampubliko iti siudad.

Nairugi idi panaglukat ti klase, maysamaysaen ti grupo ni  Singson dagiti pagadalan tapno mismo a ti mayor ti mangiyawat kadagiti bag a naglaon metten iti agduduma a ramit iti eskuela.

Kinuna ti mayor a maysa daytoy a wagas tapno maitandudo dagiti bag nga aramid dagiti kailianna a nagsanay iti babaen ti programa ti TESDA nga Alay Hanapbuhay.

Dagitoy ti dinutokan ti mayor nga agaramid kadagiti bag nga iwarasda kadagiti pagadalan imbes nga agpaaramidda  pay  laeng iti ruar ti probinsia.

Kinuna ni Singson a nawarasan met amin a first year high school students iti P500 kas tulong ti city government iti panagadal dagitoy.#

Comments are closed.