Footer

Iti maika-250 a tawen ti Nueva Segovia, Vigan, simboliko a krus, iyallawat ti Lallo, Cagayan

VIGAN CITY – Idi kanikadua gasut ket limapulo a tawen ti napalabas, sibabara a sinabat dagiti agtuturay ti gobierno ken simbaan ti grupo dagiti taga-Lallo, Cagayan tapno allawatenda ti pannakaiyalis ti diocese ti Nueva Segovia ditoy Vigan.

Inton Septiembre 7, nabarbaranto manen ti panangsarabo dagiti agtuturay ti simbaan ken dagiti government officials, civil ken religious groups ken dagiti residente ditoy siudad iti delegasion manipud iti Lallo, Cagayan tapno allawatenda ti simboliko a krus a pammaneknek ken pammatalged nga iti kaunday ti panawen manipud daydi historikal a pagteng, agtultuloy no di ket bimmileg ken pimmigsa pay ti pammati ken panagrukbab dagiti residente ken iti sibubukel a probinsia iti Simbaan Katoliko.

Kinuna ni Mayor Eva Marie S. Medina a narambakto ti Septiembre 7 agsipud ta daytoy ti kaaldawan ti panangselebrar ti Diocese ti Nueva Segovia ken ti Vigan iti maika-250 nga anibersariona.

Kas panangrambakna, nangisagana ti city government babaen ti panangidaulo ni Mayor Medina kadagiti nadumaduma nga aktibidad tapno agbalin a nakalallagip daytoy nainhistoriaan a pagteng.

Kinuna ti mayora nga inton Sept. 2, maangay ti Nasantuan a Misa iti Lallo, Cagayan a pakipasetan dagiti nadumaduma a grupo manipud ditoy siudad ken dagiti delegasion tunggal parish nga urnosen ti simbaan a makipartisipar iti nasao nga okasion.

Agrubbuatto met sakbay daytoy nga aldaw dagiti bikers ket agmotorda nga agpa-Lallo ket kalpasan ti misa, bayabayenda ti simboliko a krus iti panagdaliasatna manipud iti dayta a lugar nga agturong iti Vigan.

Aganay 100 a tattao a pakairamanan dagiti opisial ti Lallo, dagiti amin a barangay captains ken dadduma pay ti manguyog iti krus iti panagturongna iti Siudad ti Vigan, kinuna ni Mayor Medina.

“Addanto maaramid a pasalubong iti sentro ti dike. Agsisinnabatto dagiti taga-Lallo nga awitda ti krus satayonto met allawaten ditoy Vigan a pakairamanan (both) ti civil society ken ti simbaan,” kinuna ni Mayor Medina.

Kinuna ti mayora a maiprosision ti krus iti sentro a dike, agsardeng iti sanguanan ti marker ti maika-250th anniversary ti Nueva Segovia ken Vigan City iti abay ti city hall, santo agderetso iti archbishop palace a pakaangayan ti reenactment ti panagiinnallawat, maibasa ti royal decree a nakaipalaonan ti pannakaiyalis ti Diocese ti Nueva Segovia iti Vigan, ken ababa a mensahe manipud iti arsobispo ken ni Mayor Medina ken iti pannakaangay ti misa iti Katedral ni San Pablo.

Kinuna ni Mayor Medina a napagnunummuanan a maikabil ti krus iti sanguanan palasio agraman ti maysa a  marker.

Naammuan ken ni Mayor Medina nga adu pay dagiti naisagana nga aktibidad bayat ti selebrasion kas iti pannakaangay ti trade fair a pakipartisiparan ti 80, cultural shows babaen ti panagpabuya dagiti city employees ken partisipasion ti delegasion ti Lallo, Cagayan, simultaneous tree planting ti 2,500 a seedlings nga imula ti 2,500 a pamilia, ken dadduma pay a year-long activities dagiti pagadalan ken evangelical programs ti diocese.

Naiyalis ti Diocese ti Nueva Segovia manipud Lallo, Cagayan idi Sept. 7,  1758 babaen ti royal decree nga impaulog ni King Ferdinand kalpasan a kiniddaw ni Bishop Juan de la Fuente Yepez bayat ti Pontificate ni Benedict XIV.

Linaon pay ti nasao a decree nga agingga iti adda diocese ti Nueva Segovia ken nakatakder ti katedral iti Vigan, agtalinaed daytoy a siudad.#

 

Comments are closed.