Footer

Menor de edad, natiliw iti drug entrapment operation ti PDEA

BAGUIO CITY – Maysa a menor de edad a mapapati nga aglaklako iti shabu nga agpated iti P140,000 ti tiniliw dagiti operatiba ti Philippine Drug Enforcement Agency (PDEA) iti parbangon ti Agosto 25 iti sanguanan ti maysa a pagadalan ditoy siudad.

Kinuna ni Chief Inspector Edgar Apallo, officer in charge ti PDEA iti Cordillera, a natiliw ni Andy (parbo a nagan gapu ta menor de edad ti suspetsa), 17, fourth year high school ken residente iti Ismael, Dasmariñas, Cavite bayat ti mapapati a panaglakona iti droga iti sanguanan ti Quezon Eementary School iti Session Road Extension iti agarup 2:50 a.m. ti Agosto 25.

Ngem inrason ti suspetsa nga imbaon laeng ti kabsatna a mangideliber iti nasao a droga  ditoy siudad.

Naammuan a sakbayna, impalgak ti maysa nga informant iti operatiba ti PDEA nga inasitgan ti suspetsa ket guyguyoguyenna nga agbalin a drug courier daytoy ket idi saanna nga inawat, nagpabirok ti suspetsa iti gumatang iti droga.

Iti inwayat dagiti operatiba nga operasion, kinontak ti informant ti suspetsa a nangibagaanna nga adda nabirokanna a gumatang iti shabu ket imbagana nga agsarakda iti siudad.

Idi makasangpet ti suspetsa, kinontakna ti informant nga agkitada iti sanguanan ti Quezon Elementary ket ditoy nga inaresto dagiti operatiba ti PDEA.

Segun iti officer in charge ti PDEA, nakakumpiskada iti suspetsa iti dua a medium heat-sealed a plastic sachet nga agdagsen iti sagtunggal lima a  gramo a mapapati a naglaon iti shabu a mapattapatta nga agbalor iti P140,000.00.

Naipan dagiti nasamsam a plastic sachet iti crime laboratory ti PNP iti Camp Bado Dangwa, La Trinidad, Benguet para iti pannakaamirisda.

Naiwayatan met ti suspetsa iti eksaminasion tapno maammuan no agar-aramat iti droga.

Atapen dagiti otoridad ditoy a karaman ti suspetsa iti sindikato nga agiserserrek iti droga iti siudad.

Kabayatanna, uppat a mapapati a drug pusher ti natnag iti buy-bust operation nga insayangkat dagiti operatiba ti PDEA itay nabiit.

Nabigbig dagiti suspetsa a da  Mary Jane F. Espiritu, 21, residente ti  Labrador, Pangasinan; Benjamin G. Abalos, 34, residente iti Baguio City; Joel B. Fallorin, 31, residente iti  Barangay Tuding, Itogon, Benguet; ken Jordan Luther A. Managdag, 23, residente iti Puguis, La Trinidad, Benguet.

Nakumpiska iti ikut dagiti suspetsa ti uppat a plastic sachet a mapapati a naglaon iti shabu nga agdagsen iti .4 gramo nga agbalor iti P2,400.00.#

 

Comments are closed.